VC 776-te OFC-in thlun zawm dawn

Lok Sabha MP Richard Vanlalhmangaiha hoin nimin khan CWW conference hall-ah Tele-com Advisory Committee an ṭhu. Sorkar laipuia Amended BharatNet Programme kaltlangin Mizorama village council 776 chu optical fibre network hmanga thlun zawm vek an nih dawn thu tarlan a ni.

Richard Vanlalhmangaiha chuan, BSNL hotute chu Mizorama khaw tin thleng pha tura huang zauh tur leh an thlen chinte network ṭha taka thuam turin a chah a, "Sorkar laipui hmalakna PM Poshan, VB-G RAM G, MGNREGA, etc.-te changtlung zawka kalpui a nih theih nan geo-tagging tihchak kawngah Mizoramin hma a sawn theih nan ṭan in lak lehzual a ṭul," a ti.

Mizorama BSNL general manager BP Meena tarlan danin, telecom hmalakna Phase-IX hnuaiah Mizorama hmun 111 leh 4G Saturation Project hnuaia hmun 30-ah 4G network bun a ni a; Amended BharatNet Programme kaltlangin Mizorama VC 776 chu optical fibre network hmanga thlun zawm vek a ni dawn.

Tun hnaiah Saitual, Khawzawl leh Champhaiah te optical fibre cable connectivity tihzauh a ni a; telecom leh broadband service thuam ṭhat nan Serchhip, Lunglei, Lawngtlai leh Siahaah bandwidth capacities tihchak lehzual a ni.