KHAWTHLIR

Thisen pe

Pentecostal Bible School, Lunglei chuan nimin khan Civil Hospital, Lungleiah thisen unit 15 an pe a, petute mipa 13 leh hmeichhia pahnih an ni.

Rualbanlote Ni

Naktuk June 21, Pathianni hian Mizoram Presbyterian Kohhran chuan Rualbanlote Ni an hmang dawn a; thupui 'Rualbanlote chanvo ṭha siamsak' tih zirho a ni ang. Kum 1996-a Synod Inkhawmpui chuan Rualbanlote Ni hman a rêl a, June thlaa Pathianni vawi thumnaah hman ṭhin a ni.

GAC Graduation

Aizawl College (GAC) chuan nimin khan Mualpuia an campus-ah Graduation Day an hmang a, zirlai chhuak tur, BA leh B.Com zirlai 464 leh MA pass thar 16 an thlah. Vice principal Baby Lalremruati chuan, zirlai chhuak turte chu college aṭanga an chhuah hnuah pawh zirna bànsan mai loa chhunzawm zel turin a fuih. GAC hi kum 1975-ah din a ni a, zirlai 1,944 an nei mek a ni.

Zirlai lawmpui

Mamit bialtu MLA H Lalzirliana chuan nimin khan Mamit Chhimveng YMA Hall-ah MSU, Mamit buatsaih zirlai ti ṭhate chawimawina a hmanpui a, Mamita HSLC leh HSSLC-a zirlai ti ṭha 60 hnenah chawimawina a hlan. H Lalzirliana chuan, zirlaite chu an zirlaiah phûrna nasa zawk nen ṭhahnemngai lehzual turin a fuih.

Speaker-in lawmpui

Assembly speaker Lalbiakzama chuan nimin khan a pisaah kumina IIT Roorkee aṭanga M.Tech (Structure Engineering)-a pakhatna Lalawmpuia lawmpuina a hlan. Lalawmpuia hi Sihfa khawchhuak niin, Ramhlun Vengtharah a khawsa mek a, Mizoram Engineering Service-ah lutin, PHE department-ah SDO a ni.