Bandh thláwp turin ZPM-in mipui ngen

Zoram Peoples' Movement (ZPM) chuan thuchhuah siamin, North East Students’ Organisation (NESO)-in The Citizenship (Amendment) Bill, 2016 duh lohna leh dodalna lantirna atana India hmarchhak puma total bandh an huaihawt tur chu lawmawm an tih thu an tarlang a, India hmar­chhak bial mipuite chu bandh thláwpa ṭawiawm ṭheuh turin an ngen.

ZPM chuan, bill duh lohna leh dodalna atana NESO-in hmarchhak pum huapa total bandh an huaihawt tur chu an thláwp tak zet tih sawiin, "Party leh pawl bil hamṭhatna atan hmang lo a, kan ram, hnam leh sakhaw himna atana lung­rual taka ke pênho zel tur leh a chhe lai siamṭha tu nih tum zel turin Zoram mipuite kan sáwm a ni," an ti a; Bill chu pass a nih lohna atana ṭan la ṭheuh turin mipui an sawm a ni.

The Citizenship (Amendment) Bill, 2016 pass a nih a, a nghawng nat tur state sorkar leh mipui biakràwn leh hrilh an nih mai loh avangin political party leh tlawmngai pawl ṭhenkhatte'n kum 2017-ah press release siamin sorkar laipui an lo kar tawh thu an sawi a, "ZNP president Lalduhoma chuan ni 16.8.2017 khan Joint Parliamentary Committee chairman Satyapal Singh, MP hnenah Bill duh lohna memorandum a thehlut a, MPC pawhin memorandum an thehlut tawh bawk," an ti.