UDPA hnuaiah Lungleiah nuai 5,387 hû hna thawh mek leh thawh hmabak a awm

UDPA minister K Sapdanga chuan June 20, Inrinni khan Lunglei Circuit House-ah thuthar thehdarhtute a kâwm a; UDPA department hnuaiah Lunglei khawpuiah cheng nuai 5,387 hû hna thawh mek leh thawh hmabak a awm thu a sawi.

K Sapdanga chuan, Lunglei khawpui tana UDPA project-te zingah rulh leh ngai chi a awm vak loh thu sawiin, "Project tam zawk chu sum hnâr awm tur zawk a ni. Lunglei khawpui enkawlna atana sum tuakna tur project deuh vek a nih avangin a phûrawmin a lawmawm tak zet. UDPA leh LMC hotute an lawm ang bawkin Lunglei mipuite pawh an hlim ve hle kan beisei," a ti.

Lunglei Municipal Council (LMC)-in Lunglei mipui tana a thawhnaah hun rei tak hna thawk hleithei loa a awm hnuah UDPA Secretariat leh Directorate ten harsatna chinfel dan tur uluk taka an ngaihtuah thu sawiin Minister chuan, "A ṭul anga an mamawh ngaihtuahsak turin kan lo kal a ni," a ti a; Lunglei hmasawnna tura hma lak dan turah LMC hotute leh Lungleia MLA-te nen rilru inhmu taka ro an rel thu a sawi.

UDPA Minister chuan state priority project (SPP) hnuaiah cheng nuai 1,750 hu project lian 5 kalpui mek a awm tih sawiin, "Cheng nuai 400 senga Sazaikawna LMC Complex dinna turah ram lei tura biak fel tawh a man pe hlei thei loa kum hnih a awm hnuah tunah ram leina tur sum funin kan rawn thawh phei. LMC Complex sa tur hian contractor thlan fel a ni tawh a, hna an ṭan nghal thei dawn," a ti.

K Sapdanga chuan, State Priority Project (SPP) hnuaiah hian cheng nuai 350 sêngin lirthei din khawmna tur Transport Hub sakna turin Theiriatah mimal ram lei a nih thu a sawi a, "Ram man tur kan rawn keng. Contractor thlan a ni tawh. Cheng nuai 200 senga Ramthar AOC Market Shed sakna tur pawh buaipui mek a ni," a ti a; cheng nuai 300 sengin C Ṭhuamluaia Mual bula lirthei dahna tur Multi-Level Car Parking sak mek a nih thu a sawi.

Saikuti Hall chei ṭhatna turin cheng nuai 500 dah a nih thu sawiin K Sapdanga chuan, "Dawhsan (stage), ṭhutna, lighting & sound, a chung leh thil hrang hrang thlak ngai thlak leh siam ṭhat tur a ni a, a rang thei ang berin hna ṭan tum a ni," a ti.

UDPA Minister hi adviser to CM (political) Lalmuanpuia Punte, MLA, UDPA secretary K Lal-thawmmawia leh director Jacob Lalawmpuia ten an ṭawiawm a ni.

UDPA MINISTER SAWI DANG

☑ Urban Infrastructure Development Fund 2025-26 hnuaiah Lunglei khawpui tan cheng nuai 525 dah a ni.

☑ Lunglei Park cheiṭhat nan cheng nuai 200 dah a ni a, khaw ṭhat veleh contractor-te'n hna an ṭan dawn.

☑ Khawlaia vantlang inthiarna in (pay and use toilet) set khat, cheng nuai 25 zelin hmun paliah cheng nuai 100 sênga siam a ni dawn.

☑ Khawpui chhunga kea kalte veivahna footpath cheiṭhat nan cheng nuai 225 dah a ni a, khuain a zir chuan thawh ṭan thuai beisei a ni.

☑ SASCI Part-XB hnuaiah Lunglei khawpuia hmasawnna hna hrang hrang 80 thawhna tur cheng nuai 200 dah a ni a, LMC enkawl zui tur a ni.

☑ SASCI Part-V aṭangin damdawi-in bawlhhlawh, mipui tana hmuh hrehawm leh him lote tihralna tur leh damdawi-in chhung hmanrua tihral leh sawngbawlna turin Theriatah Common Bio-Medical Waste Treatment Facility din tum a ni a, ram kan nei tawh a, cheng nuai 1,400 ruahman a ni.

☑ SASCI Part-XIII hnuaiah kawr lian, hlauhawm siam thei leh a muala tawlh ṭhin venna tur storm drain siam nan Lungleiah cheng nuai 250 dah a ni.