An thu thlen a hlawhtlin loh chuan a tawp thlenga MizoTaxi dodal tum

Mizoram Taxi Association(MTA), Aizawl Two Wheeler Taxi Association (ATTA) leh Aizawl District Auto Rickshaw Owners Association (ADAROA) hruaitute June 19, 2026 zana ṭhukhawm chuan, MizoTaxi application chungchanga sorkara an thu thlenin awmzia a neih loh chuan, a tàwp thlenga dodal an rêl.

Pawl pathumte chuan, MizoTaxi online booking system ṭhat tâwk lohna lai nia an hriat sorkara an thlente a hlawhtlinna hmuh tur a la awm lo chu hriatthiam har an tih thu an tarlang a, "Tunlai ei leh bar, khawsakna sang zel leh tuialhthei man to chho zel nen, STA-in March 2024 daih tawha rate min siamsak hmantir min la tum hi, hman chi-ah kan ngai lo," an ti.

Taxi/auto rickshaw hmangtu leh khalhtute tana chhiat tawn lohna tura an ngaih, rate àwm tâwk sorkarah ziak a an thehluh tawh chu sorkarin pawmsak se an duh tih tarlangin pawl pathumte chuan, "Registration fee Rs 500 kan chawi ngai tur hi ṭha kan ti lo," an ti a; taxi/auto hmangtute'n chhiah 6%- 10% an chawi zel a ngai tur pawh ṭha an tih loh thu an tarlang.

Pawl pathumte chuan, driver/rider zawng zawngte sorkarin taxi/auto fare aṭanga fee a lak turah collector-a hman a tum an duh lo tih tarlangin, "Taxi/auto fare kaltlang a mipuia chhiah a lak tur hi eng dan hmang a lak nge a ni tih kan hre thiam lo. Sorkara kan rawtna thlente'n awmzia a nei lo zel a nih chuan, a tawp thlenga hmalak ni se kan ti," an ti.