KHAWTHLIR

Thisen pe

June 20, Inrinni khan Mizoramah pawl paliin thisen unit 145 an pe. SAY, Central South Division-in ZMCH tan unit 53 an pe a, petute mipa 39 leh hmeichhia 14 an ni. Mizoram PYD, Durtlang Bialin Synod Hospital-ah unit 26 an pe a, petute mipa 22 leh hmeichhia pali an ni. Evangelical Church of Maraland KTP, Chhaolô Bialte'n Siaha District Hospital tan unit 50 pein, petute mipa 44 leh hmeichhia paruk an ni a; KṬP, Serchhip Dinthar Branch member mipa 12 leh hmeichhia pali ten Serchhip District Hospital tan unit 16 an pe bawk.

Ruihhlo man

Lunglei Police-te chuan June 20, Inrinni zan khan Lalenkawla (25), Bawngkawn, Aizawl khalh Hyundai i10 car MZ-01 M-4566 aṭangin heroin gram 160.7 an man a; Suzuki Grand Vitara MZ-02 C-8523 aṭangin sapzu ûm hnih leh beer bûr 16 an man bawk. Car pahniha chuangte hi police-te chuan an man nghal a, Lunglei Police Station-ah thubuai ziah luh a ni.

Chetsualnaah thi

Rinthangpuia (22) s/o Sangdingliana, Thenzawl Venghlun chu June 19, Zirtawpni zan dar 10:45 vel khan Bolero pick-up nen an insut avangin a thi. Rinthangpuia hian bike khalhin, Thenzawl khaw chhungah Bolero pick-up nen an insu a, damdawi-in panpui ni mah se, a hliam tuar loin a thi a ni.

Bank hnathawh thlir

Champhaiah District Consultative Committee, District Review Committee leh District Level Security Committee chu tun hnai khan district bawrhsap Mohammad Aaquib kaihhruaiin an ṭhu a, District Annual Credit Plan 2026-27 tlangzarh a ni. Bank security chungchangah Champhai Police-in ṭhutkhawm leh hmain surprise check nei tawh se, an ti a; Champhai bank-te'n loan an pek chhuah a tam tawk loh avangin ṭan la turin an infuih bawk.

PM-Kisan Utsav Diwas buatsaih

Khawzawl KVK leh District Agriculture Office chuan June 20, Inrinni khan KVK training hall-ah PM-Kisan hnuaia inziak lutte tan PM-Kisan Utsav Diwas an buatsaih. KVK mithiamte'n leiṭha inbûk tâwka hman dan leh him zawka leilung enkawl dan an zirtir.

Lok Sabha MP-in hmanpui

Lok Sabha MP Richard Vanlalhmangaiha chuan June 20, Inrinni khan Aijal Club-ah Aizawl Mihlun Thlahte High Council
a hmanpui. MP chuan, Aizawl khawpuiin hmangaihtu leh neitu thinlung pu mi a mamawh thu a sawi a; Sairang thlenga rél a luh hnuah Aizawlah khualzin an pun nasat avangin, khualzin dawngsawng turin kawng engkimah inbuatsaih a, hmasawnna lam ngaihtuah turin kal khawmte a sáwm. Aizawl Mihlun Thlahte hi June 21, 2017 khan din a ni a, member 1,666 an awm mek a ni.