Larsap hoin Yoga Day hman a ni

Nimin June 21 kha International Day of Yoga vawi 12-na a ni a, thupui chu 'Yoga for healthy ageing' tih niin, Mizoram hmun hrang hrangah hman a ni. Directorate of AYUSH bultumin 34 Assam Rifles helipad, Zokhawsangah hman a ni a, larsap Gen. Dr Vijay Kumar Singh leh Health minister Lalrinpuii ten an hmanpui.

Larsap chuan, Yoga chu taksa, rilru leh ngaihtuahna te ṭha taka thlun zawmtu leh hriselna ṭha thlentu a nih thu a sawi a, "Yoga hrang hrangte chuan taksa leh rilru hrisel nan tinzâwn leh hnathawh dan bik an neih hran ṭheuh a, ṭangkai taka hman a nih theih nan tih dan dik Common Yoga Protocol zawm a ṭul," a ti.

Yoga awmzia leh tih dan dik sawiin, Gen. VK Singh chuan, "Taksa leh rilru lamte inrem taka siamtu a ni. Hun tam aiin tih dan phung dik a mamawh zawk a, taksa tih chêt vak vak lam a kâwk lo a, boruak hîp luh leh thâwk chhuah mil zela chet a pawimawh," a ti a; Yoga chu natna bik tidam thei tura duan a nih thu a sawi.

Health minister Lalrinpuii chuan, Yoga Day chu hriselna lam hawi hmalakna lian leh pawimawh a nih thu te, Yoga-in ni tin khawsak buai leh hah tak karah mihringte muanna leh rilru fîm a pek thute a sawi. Chief secretary Khilli Ram Meena leh 34 AR commandant Col. Laldinpuia ten thu an sawi bawk.

Yoga Day-ah hian Assam Rifles leh Mizo Air Sqn. NCC mi leh sate leh sorkar mi ṭhenkhatte an tel a; Yoga protocol angin taksa leh rilru sawisawina thilte a huhoin an ti a ni.

Press Information Bureau (PIB) hnuaia Central Bureau of Communication (CBC), Field Office, Aizawl pawhin nimin khan Aizawl Canteen kuala Hari Mandir-ah International Day of Yoga hi an hmang.