Dr R Lalthangliana'n Mamit a tlawh

Minister Dr R Lal­thangliana chuan nimin khan Mamit a tlawh a, a department chan - Health & Family Welfare, Higher & Technical Education leh Commerce & Industries hmunhmate a enfiah.

Dr R Lalthangliana chuan Mamit District Hospital a tlawhnaah, thawktute chu invawng ṭha a, hmangaihna leh dawhtheihna nena chhel taka damlote enkawl turin a chah a, "Cheng vbc. 38 sênga district civil hospital changtlung tak sakna tur Ministry of Minorities Affairs hnuaia project kal mek hi chak taka bawhzui a ni dawn," a ti a; technician, hnimhlum thiam leh specialist-te chu a hma lama Mamit damdawi-inin a neih theihna atan hmalak a nih tur thu a sawi.

Health Minister chuan, SEDP hnuai­ah mipui hriselna chu ngaih pawi­mawh berte zinga mi a nih thu sawiin, "Natna laka invenna lamah te, tihdamna lamah leh khawl leh mihringte tihchang­tlunna kawngah nasa zawka hmalak zel tum a ni," a ti a; thawktute chu faina leh thianghlimna chu tihphungah nei a, thawhhona ṭha tak nena mipui rawngbawl turin a chah.

Mamit College a tlawh­naah R Lalthang­liana chuan, "Mamit College-a arts stream-a subject hrang hrang zirna awm kim lo hi Mamit mipui tan harsatna lian tak a nih avangin a ṭul angin hmalak a ni ang," a ti a; college principal-in harsatna an neih a sawite chu a ṭul anga tihhlawh­tlin a nih tur thu a sawi.

Dr R Lalthangliana hian District Industries Centre pawh a tlawh a, Sub Divisional Industries Officer leh thawktute dangte harsatna hrang hrang bawhzui dan tur an sawiho a ni.