Mizoram hmun tinah sum leh pai harsatna a thleng - MPCC Sr VP

MPCC sr vice president Lalnunmawia Chuaungo chuan Mizoram hmun tinah sum leh pai harsatna a thleng nasa hle niin a sawi.

Lalnunmawia Chuango hian June 20, Inrinni khan Chawngtlai, Tualte, Chalrang, Khawhai, Sialhawk, Biate, East Lungdar, Mualcheng leh Khawlailung khua te tlawhin Congress party mite bakah heng khuaa lakhuihthei, sapthei leh tomato chingtute nen an inkawm a ni.

Thu sawiin MPCC Sr Vice Presidet chuan, "Mizoram chhung hmun tinah sum leh pai harsatna a thleng nasa em em a ni. Mipui sum chu mi tlemte kutah awmin, mi tlemtein an chawm a, an hawp bawk. Sum leh pai harsatna hian rukrûk, tualthah, in rawk, ruangchhar, ruihhlo tawlh nasa takin a ti hluar a ni," a ti.

ZPM Chief Minister chuan portfolio a nei ve dawn lo, tiin an in zuar tih sawiin Lalnunmawia chuan, "Mah se, tunah chuan dan humhim a, dan anga kal duh Pu K Sapdanga department chan DPAR chu mi tute emaw tana kawng sial sak duhna vangin CM chanpual atan chhuh sak a ni," a ti a, sorkar, ram rorelna ṭha he sorkara beisei chi a nih lohzia tih chian thu a sawi.