Mizoram Police-a sub-inspector batch hmasa berte'n lawmawm an ti

1st Batch Sub Inspector of Police, Mizoram 1973 chuan thuchhuah siamin, Mizoram Police-in tun hnaiah Police Modernisation Scheme (PMS) aṭanga lei thar lirthei chi hrang hrang 219 lai an dawng leh, Chief Minister-in Police unit hrang hranga hman tura June 18, 2026-a a vailiam ta chu lawmawm an tih thu an tarlang.

Mizoram Police-a SI batch hmasa berte chuan, Chief Minister leh Home Minister sawi danin, kum 2017 aṭangin PMS aṭanga lirthei lei khap a nih thu leh, kum 2021 aṭangin Mizoramin PMS a hmuh tawh loh thu an sawi a, "Mamawhna a nasat em avangin kan DGP Pu Sharad Agarwal-in nasa taka a bawhzui avanga motor hi lei thei an nih thu CM leh HM ten an sawi. A ruala motor 219 lei hi Mizoram Police SI lak hmasak ber 1973 batch-te hian kan la hre ngai lo aa, DGP leh a thawhpui ram leh department tana ṭhahnemngai tak takte kan ngaisangin kan lawmpui tak zet a ni," an ti.

1st Batch Sub Inspector of Police, Mizoram chuan, "Motor tharte hi a hmanna tur dik taka hman a nih a, hmun kilkhâwr zawk leh hnathawh ṭulna tak tak hmuna hman a nih chuan dan leh thupek kenkawhna kawngah a ṭangkai lehzual ngei ang tih kan ring," an ti bawk.