KHAWTHLIR

Champhai Venglai Branch YMA chuan, an din champha pualin January 5, Inrinni khan Champhai District Hospital tan thisen unit 45 an pe a, a petute mipa 40 leh hmeichhia panga an ni. Ramhlun Vengchhak Branch KṬP pawhin Inrinni vek khan an Kohhran Hall-ah blood donation camp huaihawtin, Synod Hospital tan thisen unit 17 an pe a, a petute mipa 13 leh hmeichhia pali an ni.

Central YMA chuan thuchhuah siamin, sorkar laipuiin The Citizenship (Amendment) Bill, 2016 a buaipui mek chungchanga North East Students Organisation (NESO)-in India hmarchhak state zawng zawngah vawiina total bandh huaihawt an tum leh, Mizoramah pawh MZP hmalaknaa total bandh huaihawt tur chu an thlàwp tlat thu an tarlang. CYMA chuan, The Citizenship (Amendment) Bill, 2016 chu an duh lo a, an duh loh thu Prime Minister leh Union Home Minister-ah an thlen tawh ṭhin thu an sawi bawk.

Mizoram Ṭhalai Kristian Pawl (MṬKP) chuan kum 2018-a rorel bawhzuiin nimin khan Christian Hospital Poor Fund-ah  Rs. 3,21,740 an hlan. MṬKP rorel 2018-ah Christian Hospital Poor Fund atan hian ṬKP unit tinin fehchhuah neih tura a rel angin, kum 2018 chhung khan unit hrang hrangte'n fehchhuah 

aṭangin MṬKP-ah Rs. 3,21,740 an chhûng lut a ni.

Traffic SP H Ramthlengliana chuan thupek chhuahin, Nursery Veng aṭanga Mission Vengthlang kawng, Vailui thleng siamṭhat hna January 7-19, 2019 chhungin zing dar 9 aṭanga tlai dar 4:30 inkarah thawh a nih dawn avangin, lirthei tlan phal a nih loh thu a tarlang a, "Hnathawh tibuai thei turin kawngpui sirah lirthei leh bungraw dang dah phal a ni lo," a ti.

Excise & Narcotics dept., Champhai chuan nimin khan New Champhaiah heroin gram 26.6 an man a, a neitua puh Mangsianvung (55) s/o Langzahthang, Myanmar leh Chingzalian w/o Zirthang, New Champhai nia inchhal pawh an man nghal.