Good Governance Day - December 25 Mizoram sorkarin a la hmang lo

Department of Personnel and Admi-nistrative Reforms (DPAR) hotute chuan, Good Governance Day, December 25 chu India ram hmun dang ṭhenkhatah hman ni mah se, Mizoramah hman a la ni ngai lo tih an sawi. Hetih lai hian, Mizorama tlawmngai pawl hrang hrangte chuan Krismas ni-a Good Governance Day hman an duh loh thu, tun hnai khan thuchhuah siamin an puang tawh a ni.

Vanglaini palai zawhna chhanga DPAR hotute sawi danin, Good Governance Day hi kum 2014 aṭangin hman ṭan ni mah se, Krismas ní tak a nih avangin Mizoram sorkarin a la hmang ngai lo a, kum 2014 leh 2015-ah hman a ni lo ve ve.

DPAR hotute chuan, kuminah Good Governance Day hman tur chungchangah sorkar laipui aṭangin hriattirna emaw an dawn loh thu an sawi a, "Tun dinhmunah chuan Krismas ní taka Good Governance Day hman tumna emaw, hmang tura inbuatsaihna a awm lo," an ti.

Mizoram Kohhran Hruaitute Committee (MKHC) chairman Rev. H Lalrinmawia, Synod moderator chuan, Krismas ni taka Good Governance Day hman chu ṭha an ti lo hle tih sawiin, "Kristiante ni pawimawha Good Governance Day hman hi kan duh lo hulhual a ni ber mai. Kan duh lohna lantir dan tur erawh chu December 20 khian kan
ṭhukhawm ang a, kan la ngaihtuah ang," a ti.

MKHC secretary Rev. R Lalrinsanga, UPC (NEI) pawhin, Good Governance Day chung-changah hian kum 2014 khan an duh loh thu an lo puang tawh tih a sawi a, "Prime minister Narendra Modi hnenah lehkha kan thehlut tawh a, PM pawhin acknowledgement min rawn thawn let a; mahse, kan lehkha a lo hmuh thu a ni ber a, thil dang sawi a nei lem lo," a ti.

Rev. R Lalrinsanga chuan, BJP president Amit Shah-a'n Mizoram a rawn tlawh ṭumin Krismas ní-a Good Governance Day hman an duh loh thu an lo thlen bawk tih a sawi a; Good Governance Day neiha hman hrim hrim chu ṭha an ti a, mahse, Kristiante ni pawimawh ber khera hman erawh ṭha lo an tih thu a sawi bawk.

Mizorama tlawmngai pawl lian ber, Central YMA chuan December 12, 2016 khan thuchhuah siamin, sorkar laipuiin Krismas ní tak, December 25-a Good Governance Day hman tur a ti chu hriatthiam harsa an tih thu te, Kristiante ni pawimawh tihbawrhbân a nih loh nan a tàwp thlengin hma an lak dawn thu te, Mizo mipui hmuhsitna leh zahlohna leh, Kristian rinna tihdal tumna hmanrua pakhata an ngaih thute an tarlang tawh a ni.

Zirlai pawl pahnih - MZP leh MSU-te pawhin December 13, 2016 khan a hran ve vea thuchhuah siamin, Krismas ní-a Good Governance Day hman tura tih a ni chu ṭha lo an tih thu an lo puang tawh bawk.