Hlawh lak mumal loh chhan sawifiah

School Education department chuan thu-chhuah siamin, SSA leh RMSA hnuaia thawkte'n hlawh an lak mumal theih loh chhan an sawifiah a, "Hlawh lak a nih theihna atan theihtawp chhuah mek a ni," an ti.

School Education department tarlan danin, SSA-a thawkte hlawh tur chu sorkar laipui aṭangin cheng vbc. 37.06 leh Mizoram sorkar aṭangin vbc. 6.13 dawn a ni tawh a, state matching share cheng nuai 160 pawh Mizoram sorkarin a pe tawh.

RMSA-ah pawh sorkar laipui aṭangin vbc. 19.16 leh Mizoram sorkar aṭangin cheng nuai 132 dawn a ni tawh a, state matching share cheng vbc. 159 chu Mizoram sorkarin a pe tawh bawk.

Sorkar laipui aṭanga sum hmuh ang ang chu Mizoram sorkarin a khinglet nghal zel a, Planning leh Finance department-te pawhin theihtawp an chhuah nghal zel. Tunah hian second instalment sorkar laipuiah dil mek a ni.

SSA-a thawk zirtirtute hlawh atan thla khatah cheng nuai 850 leh RMSA-a thawkte tan nuai 250 mamawh a ni. Sorkar laipui aṭanga SSA atana sum hmuh hian thla li hlawh bak a daih lo a, RMSA atana sum hmuhin thla ruk hlawh bak a daih rih lo. Sum hmuh zawng zawng hi hlawh atan hman theih a ni lo a, civil work leh hna dang atan eng emaw zat dah a ngai.

Sorkar laipuiin sorkar kum kal mek 2016-17 chhungin India ram puma SSA kalpui nan cheng vbc. 47,200 vel a mamawh a, chutih laiin, budget-a sum a dah theih chu cheng vbc. 22,500 vel chiah a ni; chu chu India ram puma SSA sum mamawh aṭanga chhûtin 47% vel a ni.

Sorkar laipuiin budget-a sum a dah tlem avang hian Mizoram tana sum lo kal pawh a tlem a, hei hian thawktute hlawh thlengin a nghawng lo thei lo niin School Education department thuchhuah chuan a tarlang.