MNF sorkarah aiin Congress sorkarah Hmansawnna a chak zawk: Zodintluanga

Congress Legislature Party (CLP) treasurer Zodintluanga, cabinet minister chuan nimin khan Aizawl Press Club-ah thuthar thehdarhtute a kâwm a; MNF-in kum 10 sorkarna an chan lai aiin Congress party-in kum riat sorkarna an chan tawh chhungin Mizoramah hmasawnna a chak zawk hle niin a sawi.

Zodintluanga chuan, MNF president Zoramthanga'n Congress party rorel chhungin hmasawnna a awm loh thu leh hmasawnna hna a châwl anga a sawi chu thu belhchian dâwl lo a nih thu a sawi a, "Development chungchang kan sawi a nih chuan MNF kum 10 sorkar chhung leh tun Congress sorkar hun kum riat chhung hi kan khaikhin a ngai. Zêldin thu leh mahni duh anga phuahchawp mai loin, engtik lai pawhin hmasawnna hna thawh hi chhinchhiah kîlh kêlh vek a nih tawh avangin ena khaikhin theih a ni," a ti.

PHE Minister hian PHE depart-ment bika MNF sorkar hnathawhte leh Congress sorkar chhunga hna-thawhte a sawi a; sorkar depart-ment danga hnathawhte pawh a tahtawla an puan chhuah zel dawn thu a sawi.

Zodintluanga chuan, PHE depart-ment bikah MNF kum 10 sorkar chhunga hmasawnna aiin tuna Congress sorkar kum riat chhunga hmasawnna a punna chu 235% a tlin thu a sawi a, "Congress sorkar chhunga PHED-a hmasawnna sum hmuhin MNF kum 10 sorkar chhunga sum hmuh a khûmna hi nuai 47,213.15 a tling," a ti.

PHE Minister chuan, Mizorama development luh dan kimchang taka an tarlante chu state pakhat CM ni thei Zoramthanga'n lo en chiang se, lo khaikhin ve se a duh thu sawiin, "Tun hnuah chuan ziaka chhinchhiahna mumal tak nen hmasawnna lo luh dan thu dik chauh a sawi tawh ngei kan beiseiin kan phût tlat a ni," a ti a; MNF President chu development sawi ngam tur a nih leh nih loh lo inngaihtuah nawn se a duh thu a sawi.

Zodintluanga chuan, MNF sorkarin an hlamzuihtir Tuirial Hydro Electric Project leh Referral Hospital siam turte chu Congress sorkarin bul an ṭan ṭha leh a, a hlawh-tling mek tih a sawi a, "Tunah phei chuan Referral Hospital-ah medical college din tura hmalak a ni," a ti.

Minister Zodintluanga thusawite :

θ MNF sorkar hun 1998-2008 chhungin PHE department-in major work a thawhte chu NLCPR, AUWSP, 10% GBS, JNNURM, NRDWP/ARWSP, TSC/SBM (G), ACA/SPA aṭanga sum hmuhte hmanga thawh a ni a, kum 10 chhungin cheng nuai 20,111.73 an hmu a ni. Congress sorkar hnu, kum 2008-2016 chhungin Mizoram PHED-in major work atana NLCPR, NEC, 10% GBS, JNNURM, NRDWP/ARWSP, TSC/SBM (G), NABARD, ACA/SPA aṭanga sum a hmuh chu cheng nuai 67,324.88 a ni.

θ MNF sorkarin hna chi li thawkin sum hman zat chu cheng nuai 9413.81 a ni a, Congress sorkar hnuaiah NLCPR aṭangin water supply scheme chi 10 thawk tawhin, sum hman zat chu nuai 10,778.40 a ni. Sum hman inthlauhna chu nuai 1364.58 a ni.

θ MNF sorkarin North Eastern Council (NEC) aṭangin project hnuh chhuah an neih loh laiin, Congress sorkarin kum 2009 aṭangin project pasarih an hnûk chhuak tawh.

θ Congress sorkarin National Drinking Water Program (NRWDP) leh Accelerated Rural Water Supply Scheme (ARWSP) hnuaiah cheng nuai 28,843.84 an hmuh laiin, MNF sorkarin nuai 2,915.47 an hmu.

θ Total Sanitation Campaign-ah MNF sorkarin cheng nuai 1,425.80 an hmu a, Congress sorkarin Total Sanitation tlukpui Swachh Bharat Mission (Gramin)-ah nuai 3,004.21 an hmu tawh.

θ Congress sorkarah NABARD aṭangin project 33 thawh a ni tawh a, cheng nuai 5,639.30 hmuh tawh. MNF sorkarin NABARD aṭangin sum hmuh an nei lo.

θ ACA/SPA aṭangin Congress sorkarin cheng nuai 7,564.57 an hmuh laiin, MNF sorkarin nuai 3,648.86 an hmu.

θ MNF sorkar kum 10 chhunga PHED hnuai bika sum an hmuh zawng zawng chu nuai 20,111.73 a ni a; Congress sorkar kum riat chhunga sum an hmuh tawh zat chu nuai 67,324.88 a ni.