Sorkar hnathawk leh politician-te hi Mipui chhiahhlawh kan ni - CM Hawla

Chief minister Lal Thanhawla chuan, sorkar hnathawk leh sorkarna fawng vuantu politician-te chu mipui chhiahhlawh an nih thu a sawi a, "Kan induh a thiang lo," a ti.

December 14, 2016 tlaia 132 kV Central Sub Station, Melriata mi a hawnnaah Lal Thanhawla chuan, "Sorkar hnathawkte chu sorkar chhiahhlawh leh politician sorkar fawng vuantute chu mipui chhiahhlawh an ni a, kan induhin mipui kan dah hnuai a thiang lo," a ti a; mahni hnathawhna ṭheuha mipui tana dàwr nuam, hna thawk ṭha leh rinawm leh langtlang taka thawh a pawimawh thu a sawi.

Chief Minister chuan, ram ṭhang zel leh khawvel changkang mekah kawlphetha a pawimawh telh telh tih sawiin, "Kawlphetha tel lo chuan hmasawnna a awm thei lo. Hmasawnna hna thawh nan kan kawlphetha mamawh a sang zel a, kan mamawh ngaihtuahin kan siam chhuah a la tlem si a, a siam chhuah lamah ṭan lak a ngai hle a ni," a ti.

CM Hawla chuan, kawlphetha lak luhna leh a sem chhuahnaah hloh (transmission & distribution loss) chungchangah Mizorama a san thu sawiin, "Department pawhin an vên hneh lo chu êng rûk hi a ni a, hei hian sorkar tan sumpai lamah hlohna a thlen bakah, mi dang tan harsatna a thlen a ni," a ti a; transmission & distribution loss tihtlem nan theitawp chhuak mek a nih thu a sawi.

Kawlphetha siam chhuahna turin sorkarin lui khuah a ngaih pawimawh thu sawiin Chief Minister chuan, "Lui zawng zawng khuah chu a ṭha lo a, mithiamte ráwn chungin hmalakna kalpui mek a ni. Lui khuapa kawlphetha siam chhuahna kawngah potential nei ṭha mah ila, ni zung hmanga kawlphetha siam chhuah hi sorkarin a ngai pawimawh a, solar policy ṭha tak duan mek a ni," a ti.

Melriata 132 kV Central Sub Station hi North Eastern Council (NEC) sum hmanga 90:10 funding pattern-a departmental work anga siam a ni a; August 2006 aṭangin hna thawh ṭan niin, March 2012-ah physical completion zawh a ni a, September 2016 khan technical commissioning peih a ni. Hnathawhna atan cheng nuai 1341.44 ruahman a ni.

Central Sub Station siam rual hian a thlun zawmtu leh a châwmtu tur 132KV line, ‘Construction of 132kv S/C Transmission line from Luangmual sub-station to Melriat (17.06 km) & 132 KV bay at Luangmual’ siam a ni a; hna thawhna atan NEC sum cheng nuai 838.37 hman a ni.

Sub-station thar Ṭhatna turte

(P&E tarlan dan)

ϖ Load sem chungchanga harsatna tawh lian tak tak, 132KV Sub-Stations, Zuangtui leh Luangmuala mite nasa takin a chhâwk zângkhai thei dawn. Tunah pawh hian 33kV Sub-Stations, Tlangnuam leh Aibawkin a châwm khua leh vengte chu Melriat sub-station kal tlangin châwm an ni tawh.

ϖ Tuna hrui thlun zawh ṭêp tawh, 132kV line Melriat sub station aṭanga Lunglei chu a taka hman theih a ni tawh ang a, chu chuan Mizoram chhim lam zawng zawng, Serchhip (Bukpui) aṭanga pek ṭhin line a chhiat cháng leh maintenance shut down lak a nih chángin chhim lamte power pek theih a ni tawh ang.

ϖ Tuna a hrui thlun zawh ṭêp tawh - 33kV line, Melriat Sub-Station aṭanga chhuak chuan 33kV Sub-Station Mualpui leh Tlangnuam sub-station te châwmin, Melriat Sub-Station aṭang hian pek a nih tawh dawn a; hei hian tuna Aizawl khawpuiin transformation capacity-a harsatna a tawh ṭhinte a chhâwk zângkhai thei dawn.

ϖ Melriat Sub-Station-in load a lak ṭhen tâk avangin Luangmual Sub-Station
aṭanga PHE tui pump khawl lian te, ISPAT, Lengte-te pawhin an duh ang zat zat, an duh hun hunah power an la thei tawh dawn.