MNF party-in December 25-ah Good Governance Day hman an duh lo

MNF party National Executive Committee chu nimin khan Vanapa Hall-ah an ṭhukhawm a, an president Zoramthanga'n a kaihruai. Sorkar laipuiin Good Governance Day ni atana Krismas ni, December 25 a ruat chu ṭha an tih loh thu an puang.

MNF NEC ṭhukhawm chuan resolution pass in, "Sorkar laipuiin Good Governance Day ni atan Krismas ni, December 25 an rawn ruat hi ṭha kan ti lo a. Kristiante ni pawimawh ber pakhat a nih avangin Kristiante tan chuan hman theih a nih ve loh avangin Kristiante'n kan hman theih ve dan tur ni remchang remruat dan siam ni se ṭha kan ti a ni," an ti.

MNF resolution chuan, Congress sorkar ding lai chu mipuiin an ning hle nia tarlangin, "Sum an enkawl dan dik lo lutuk vanga pawisa che vel váng te, department hnathawhna tur nei lo ṭhu ṭhuap te, thla tam hlawh lâk tur nei loa khawngaihthlak taka zirtirtu sàng tél awm te, kohhran budget khûm ziah ṭhin nuai za téla pha ta lote leh chutih laia chhiah leh bill pek tur sang lutuk ta hi ninawm kan ti," a ti a; Congress sorkarah hmasawnna tinreng a châwl niin a tarlang.

MNF chuan, kohhran ngenna pawisa loa sorkarin zu a zawrh luih avangin police za tél leh mipui sang tél an thi a, corruption rapthlak tak tak a lang thar zel nia sawiin, "Kum 2018 Inthlana hneh taka paihthla turin hna-thawktute’n kum tharah hma la tur leh Zoram mipui zawng zawngin Cong-ress hi hnâwl vek tawh turin kan ngen a ni," an ti.

MNF resolution chuan, Mizoram Assembly session hnuhnung bera MLA Lalruatkima zawh belhna chief minister Lal Thanhawla’n mawi lo taka ‘Ka chhang dawn lo’ a ti chu a MLA puite leh Mizoram mipui zahlohna lian taka an ngaih thu a tarlang bawk.

Nimina MNF NEC ṭhukhawm hian politics boruak an thlir a, kum 2017-a an hmalak dan tur an sawiho a ni.