Gas-a sorkar hmalakna tarlang

Aizawl DC Kannan Gopinathan chuan thuchhuah siamin, eirawngbawlna gas harsatna tihziaawmna tura Aizawl district chhunga sorkar hmalaknate a tarlang.

Aizawl DC tarlan danin, dan kalha gas hralh a awm ṭhin nia sawi titawp turin Aizawl district administration leh police-te'n theihtawp an chhuah a; kumin August thla khan gas bûr 92 man niin, a neitu nia hriatte chu Essential Commodities Act hnuaiah show cause notice pek an ni a, confiscation order chhuah a ni.

August 2016 hnu lama dan loa hralh tur nia hriat gas bûr man zawng zawng nen a vaiin gas bûr 175 man a ni tawh. Dan loa eirawngbawlna gas hmanga sumdawnnaa inhnamhnawihte chu Essential Commodities Act, 1955 leh LPG (Supply & Distribution) Order, 2000 hnuaiah kum sarih thleng tàn theihna a nih bakah, gas bûrte leh a phurtu lirtheite chu mana chhuhsak theih a ni.