Nupui hlui thattu thiam loh chantir

October 4, 2015-a a nupui hlui thattua puh J Lalramliana (56), Sesawng Vengthar chu Additional District & Session judge Vanlalremmawia chuan thiam loh a chantir a, kum 10 chhung jail-a táng tur leh Rs. 5,000 chawi turin a hrem.

Thu dawn danin, J Lalramliana leh a nupui H Lalmalsawmi te chu an inhmuh thiam loh deuh avangin nikum khan an inṭhen a; J Lalramliana hian a nupui hlui chu mipa dang nena an awm dûn lai hmuin, chemin a sât hlum a ni. He thil thlengah hian Bawngkawn Police Station-in thubuai an ziak lut.

J Lalramliana hi IPC Section 302 hmanga thubuai siamsak ni mah se, tum lâwkna awm lo leh thin thawk thut vanga tualthat a nih avangin IPC Section 304 (Part 1) hmanga thiam loh chantir a ni a; kum 10 táng tura tih a nih bakah hian, pawisa chawi tura tih Rs. 5,000 a pek theih loh chuan thla hnih dang tàn belh tura tih a ni.