State level Khelo India ṭan a ni

State level Khelo India Competition 2016-17 chu nimin khan Rajiv Gandhi Stadium-ah ṭan a ni a, Sports & Youth Services additional secretary PS Sanghluna'n a hawng.

PS Sanghluna chuan, "Mihringte hian talent kan nei ṭheuh a, kan talent dawnte hmang chhuak thiam tura huaisenna kan neih a ngai. Sports-ah Mizote'n hma kan sawn em em a, India rama a sang ber pawlah kan invawrh mek tawh a, sang zawk thleng turin kan inbuatsaih a ngai. Chutiang tur chuan kan taksa pawh ruih theih thil lakah a fihlîm a ngai a ni," a ti.

State level Khelo India Competition-ah hian mipa leh hmeichhia intihsiakna chi hrang 10 ve ve a awm. Competition hi Mizorama district tinah neih a ni tawh a, district tina champion ṭheuhte'n Aizawlah inelna nei lehin, chuta champion-te chuan Mizoram aiawhin India ram pum huap inelna an hmachhawn leh dawn a ni.