Chawngtlai leh Tualte khaw loah Pluck & Pay Festival hmang dawn

Nimin khan Tourism minister Lalnghinglova Hmar hoin a pisaah Chawngtlai leh Tualte khaw loa 'Pluck & Pay Festival (lo la, lei rawh) hman dan tur rêl a ni a, September 23-25, 2026 chhungin hman turin an rel.

Tourism Minister chuan, Pluck & Pay kalhmang chu Mizoramah thil thar a nih thu a sawi a, "Mizoram tourism-ah bung thar kan kai dawn a, a phûrawm tak zet. Mizoram sorkarin mipui leh khawtlang nena ṭangruala tourism hmasawnna ‘community-based tourism’ a uar chho mek," a ti.

Pluck & Pay Festival-ah hian Tourism department-in sumdawn a tum loh thu sawiin Lalnghinglova Hmar chuan, sorkarin a thlengtu khuate’n hlâwkpui se a duh ber thu a sawi.

Plug & Play Festival hi Tualte-ah hawn a ni ang a, Chawngtlaiah khârna hun hman a ni ang. Khaw pahniha lo leh huanahte kalin, thlai leh theite chu mahnia loin, a lei theih dawn a ni. Ṭhutkhawmah hian, thlai leh thei lawh mai bakah, mikhualte tana tih tur hrang hrang -– pipu uai, sairawkherh inperhsiak, kalchhet kal leh a dangte a hmunah buatsaih an rêl.

Khaw pahnihah hian thlai leh thei bakah thil dang chi hrang hrang zawrh chhuahna tur siam a ni dawn a; a hawn ni leh tawp zanah concert buatsaih tum a ni. Mizoram chhung leh pawn thleng pha turin publicity kalpui an rêl bawk.

Ṭhutkhawmah hian Tourism leh Horticulture department hotu te, Khawzawl DC aiawh, Chawngtlai leh Tualte VC president-te leh event management agency aiawhte an tel a ni.