Larsapin CVScAH, Selesihah hun a hmang

Governor Gen. Dr Vijay Kumar Singh chuan nimin khan College of Veterinary Sciences & Animal Husbandry (CVScAH) Selesihah Central Agricultural University (CAU), Imphal hnuaia ṭhutkhawm pawimawh pathum - 15th Research Council Meeting, 11th Extension Education Council Meeting leh 33rd Academic Council Meeting-te a hawng.

Gen. VK Singh chuan, CAU chu hmarchhak state agriculture sector-a hmasawnna thar thlentu pawimawh a nih thu a sawi a, "CAU-in policy kaihhnawih lehkhabu ṭha tak 'Transformation of the Mizoram Economy from US Dollar 540 Millions to US Dollar 6,394 Million @ 2047' an siam hi a lawmawm tak zet a, Mizoram hi agriculture-a innghat a nih avangin he ruahmanna awmze nei leh huapzau tak hian Mizoram hmakhaw êng tak a siam thei dawn a ni," a ti.

Hmasawn turin district leh khawtlangin awmze nei taka hma an lak theih nana ruahmanna siam a ṭul thu sawiin Larsap chuan, "Hmaih bik awm loa agriculture leh a kaihhnawiha ṭan lak nasat a ṭul," a ti a; sorkar laipuiin loneitute hmasawn nan ruahmanna hrang hrang a siam thu leh chumi tipuiltling tur chuan mithiamte leh loneitute ṭanho a ṭul thu a sawi.

Gen. VK Singh chuan, scientist, college-a thawkte leh zirbingmi kalkhawmte chu thil thar leh ṭha zawk ngaihtuah chhuak a, loneitute ṭha taka kaihruai turin a fuih a; Mizoram leh hmarchhak state-te'n hma an sawn zel theih nan theihtawp chhuahpui turin kalkhawmte a sawm bawk.

Larsap hian CVScAH, Thenzawla College of Horticulture leh KVK ten he ni puala exhibition an buatsaih a fang kual a; lehkhabu hrang hrang a tlangzarh nghal a ni. Ṭhutkhawmte hi June 22-24, 2026 chhung neih a ni ang.

Tarlan danin, CAU hian hmarchhak hmun hrang hrangah college 13, KVK paruk, multi-technology testing centre paruk leh vocational training & testing centre paruk a nei mek a ni.