Mission AIDS Suraksha hmalakna sawiho

Lunglei District AIDS Prevention & Control Committee (DAPCC) chu an chairman Navneet Mann, bawrhsap hoin nimin khan DC conference hall-ah an ṭhukhawm a, Mission AIDS Suraksha (MAS) chungchang leh hmalak dan tur an rêl.

Navneet Mann chuan, MAS chu HIV/AIDS darh zel tur venna leh HIV veite’n an dinhmun an hriat chian a, enkawlna ṭha an dawn theihna tura Ministry of Health & Family Welfare hmalakna thar a nih thu a sawi a, "Kan district-ah hlawhtling taka kalpui a nih theih nan department hrang hrangte'n thawhhona ṭha tak nen kan tih tur ṭheuh kan hlen a ngai. Ram dang nena ramri nei district kan nih avangin HIV ven leh enkawlah nasa zawka ṭan kan lak a ṭul," a ti.

MAS hnuaiah hian Lunglei district-ah 95:95:99 tihlawhtling turin hmalak a ni. 95:95:99-in a tum chu, HIV vei zinga 95% talin an vei a ni tih an inhriat theih nan zau zawka thisen endik te, HIV vei hmuh chhuah tawh zinga 95% talin anti-retroviral therapy (ART) ṭha taka an lak theih nana hmalak te, ART latu 99% talin an ṭhatpui a, mi dang kai chhâwng thei lo khawpa viral load hniam an neih theih nana hmalakte a ni.

Tarlan danin, MAS target tihlawhtling tur hian zirna-in leh sorkar pisa a tam thei ang berah HIV/AIDS chungchang inzirtirna leh thisen endik bakah, Healthy Lunglei District Campaign hnuaiah hmalak a ni a; tlawmngai pawl leh kohhran hrang hrangte nen thawhhona tur ruahman mek a ni bawk.

Ṭhutkhawmah hian tleirawl kum 13-17 inkar zingah HIV/AIDS leh STI/RTI chungchang inzirtir nan pawl 8, 9 leh 11 zirlaite pualin June 30, 2026-ah Red Ribbon Quiz Competition buatsaih an rel a; intih-siaka pakhatna chu state level competition-ah Lunglei district aiawhin an tel dawn a ni.