Minister Lalnghinglova Hmar-in a bialah uniform pheikhawk a sem

Minister of state Lalnghinglova Hmar chuan nimin khan a bial Aizawl West-II chhunga sorkar sikulah zirlaite tan uniform pheikhawk a sem chhunzawm a; sorkar sikulte chu a ṭha a, a rintlak tawk tih mipuiin hria se a duh thu a sawi.

Lalnghinglova Hmar hian June 17, 2026 aṭang khan a biala sorkar primary school zirlaite bun tur uniform pheikhawk a sem ṭan a, nimin khan a hnuhnung ber atan Mizoram Institute of Comprehensive Education (MICE), Tuikual North-a Primary School Section zirlaite tan uniform pheikhawk bun 139 a sem. Heti hian a biala sikul pariatah pheikhawk bun 692 a sem a ni.

Lalnghinglova Hmar chuan, sorkar sikulah zirna a ṭhat thu a sawi a, "Pawl sang lamah sorkar sikula luh kan intihhmuh a, kan inchuh nasat hle a; chutihlaiin, pawl hniam lamah luh loh kan intihhmuh thung. Sorkar sikulte hi a belh tlak a, a rintlak a, a ṭha tâwk tih mipuiin hria se ka duh," a ti.

Mizorama PM SHRI School-te zinga mi MICE School-a pheikhawk semna inkhawmah hian Minister chuan, MICE zirtirtute hnathawh a taka a hmuh chuan a tihlawm thu a sawi a; hmasawn lehzual tuma ṭhahnemngai leh taima taka thawk zel turin a fuih bawk.

Uniform pheikhawk sem inkhawmah hian zirtirtu leh zirlaite bakah, Tuikual North LC member-te leh zirlai nu leh pate an tel a ni.