Minister-in Kulikawn damdawi-in a tlawh

Health & Family Welfare minister Lalrinpuii chuan nimin zing khan Kulikawn Hospital a tlawh a, khum 10 awmna tur TB Unit Isolation Ward leh Infectious Disease Ward building sakna tur hmunhma a en.

HFW Minister hi Health Services Director, Hospital & Medical Education Director, NHM Mission Director, Aizawl West CMO leh department hotu dangte'n an ṭawiawm. National Quality Assurance Standards leh Infant Mortality Rate (IMR)-ah Mizoram HFW department-in hna a thawh ṭhat vanga Ministry of Finance-in lawmman a pek tur chungchang sawiho a ni.

Lawmman dawn tur sum hmanga TB Isolation Ward leh Infectious Disease Ward sak tum a ni a, Health Minister hian ward pahnih awmna tur building sakna tur hmunhma a en a; in thar sakna tur huam chhunga staff quarters hlui ṭhiah ngai zat leh hmalak dan turte sawiho a ni bawk.

Lalrinpuii hian Kulikawn damdawi-in Paediatric ward pawh a tlawh a; mamawh an lo thlente chu a theih anga ranga hmalaksak a tum thu a sawi.