Education Minister-in thil ṭhaah chuan huai taka ke pên turin officer-te a chah
School Education department officer-te chuan nimin khan Education Complex conference hall-ah Quarterly Review Meeting an nei a; an hun hmanpuitu Education minister Dr Vanlalthlana chuan, officer kalkhawmte chu thil ṭhaah chuan huaisen taka ke pên turin a chah.
Education Minister chuan, ram hma lam hun chu Pathianin zirna lama thawkte kutah a dah thu sawiin, "Mawhphurhna kan neih ang hian kan che chhuak em tih inenfiah a ngai. Meeting aṭang hian thil nih dan dik tak kan hriat phah a, Mizoram Education Reforms Committee-in rawtna an dawnte sawiho ṭhin a ni," a ti.
Sikulah kalphung ṭha neih a ngaih thu sawiin Minister chuan, "Kalphung ṭha kan hman ngam leh hman theih tur kan duan a ngai. Kan hnunga lo awm zel turte pawhin an hman tur system ṭha kan siam a ngai a, chumi atan chuan data kan neih ṭhat a ngai," a ti a; kalphung ṭha nei turin MERC-in ngaihtuahna an hman mek thu a sawi.
Dr Vanlalthlana chuan, officer kal khawmte chu thurâwn leh rawtna nei ṭhin tur te, thil ṭhaah chuan huai taka pên chhuak ngam tur te, kal dan ṭha zawk a awm a nih chuan sawi ngam tur leh, infinchhuah ngaihna apianga finchhuah ṭhin turin a chah a, "Thil dik lo, dan kalha thil tihte a awm chuan kal thui hmaa inhrilh a, a ṭha zawk turah chuan insiamṭhat hi kan tih tur a ni," a ti.
Education Minister chuan, hma lam hunah ṭhangtharte'n, 'Zirna siamṭhat a nih aṭang khan hei hi kan nei ve thei ta' an tih theih nan ruahmanna neih ṭhat a pawimawh tih sawiin, "Zirlaite an zirnaah an hlawhtling ta lo a nih pawhin, eizawnna kawng an zawh theih nan intodelhna project kalpui mek a ni," a ti a, zau zawka kalpui dan ngaihtuah a ṭul thu a sawi.
Education consultant Rev Dr K Thanzauva pawhin thu sawiin, "Hmasawnna chi hrang hrangte hi han thawk bawk mah ila, rual kan pawl ve theihna tur leh kan ramin ramdang ruala ke a pen ve theihna awm chhun chu zirna hi a ni. Zirna siamṭhatna kawngah kohhran, sorkar leh mipui ṭanho a ṭul," a ti.
Review Meeting-ah hian School Education department hnathawh leh hmalakna te thlirho a ni a, Directorate-in hna lakna tura rules leh syllabus ennawn mek an buaipui dante ngaihthlak a ni. SCERT, MBSE leh Samagra Shiksha hmalaknate leh hnathawhte thlirho a ni a; department-a hmalakna leh hmachhawpte sawiho a ni bawk.