Darzo-a tuihna tihpunna tur hawng

Bharat Forge leh Confederation of Indian Industries (CII) ten Darzo khuaa tuihna tihpunna tur project an ruahman, Bharat Forge corporate social responsibility (CSR) sum hmanga thawh tur chu nimin khan adviser to chief minister leh Mizoram CSR Cell chairman TBC Lalvenchhunga, MLA-in a pisaah a hawng.

Ground Water Rejuvenation project hmang hian Darzo khaw ram hectare 1.93-a zauah ruahtui tlinna tur khur (trench) 1,000 laih a ni dawn a, Young Indian (YI), Mizoram Chapter-in an thawk dawn. YI hi CII hnuaia ṭhalai pawl a ni.

TBC Lalvenchhunga chuan, Darzo khuaa tuihna tihpunna project atana sum petu Bharat Forge chu Mizoram CSR Cell nen an thawk dun ṭha hle tih sawiin, "An chungah kan lawm a ni," a ti.

Bharat Forge vice president Dr Leena Deshpande chuan, an CSR-te chu hlâwk leh ṭangkai taka hman an duh tih sawiin, "Darzo project hi vawiina mite leh chhuan la awm zel turte tana ṭangkai tur a ni," a ti a; tuihna humhalhna leh tihpunna lama hmahruaitu a nih an beisei thu a sawi.

Project hawnnaah hian Bharat Forge, CII leh Darzo VC ten project kalpui tura inremna, Memorandum of Understanding an inhlan tawn nghal a ni.