Mizo ṭhalai 100 tana buatsaih UPSC free coaching hawn a ni

Mizoram Youth Commission (MYC) leh Drishti IAS, Delhi thawhhonaa pawisa chawi ngai loa mi 100 tana MYC Coaching building-a UPSC Coaching class buatsaih chu nimin khan chief secretary Khili Ram Meena-a'n a hawng.

Chief Secretary chuan, Mizo ṭhalaite UPSC exam-a hlawhtling an awm lohna a rei hle tawh tih sawiin, "Union Home Minister-in a ngaimawh hle a, Mizo ṭhalaite'n kaihhruaina ṭha an dawn a, hlawhtling an awm thuai theih nan he free UPSC coaching hi buatsaih a ni. Finance department-in sum leh pai ṭul a tum a, ṭul dang a awm pawhin ngaihtuah zel a ni dawn," a ti a; sorkar hmalakna chu coaching-a tel zirlaite'n hlawhtlinna hmanga an chhân lêt ngei a beisei thu a sawi.

MYC chairman Malsawmzuala Ralte pawhin thu sawiin, "Coaching class kal mekte hi an mamawh zawng zawng sorkarin a pe a, an tih ve tur - taimak, thawhrim leh tumruhna hmangin Mizoram sorkar leh mipui beiseina tihhlawhtlin tumin an ṭang ve tur a ni," a ti.