KHAWTHLIR

Thisen pe

Mizoram Home Guard and Civil Defence, Chawlh-hmun chuan nimin khan Civil Hospital, Azawlah blood donation camp neiin, thisen unit 32 an pe a, petute mipa 29 leh hmeichhia pathum an ni. PM Shri MICE School NSS-te'n unit 15 an pe bawk.

Computer hlan

Rashtriya Gram Swaraj Abhiyan (RGSA) hnuaiah nimin khan Khawzawl DRDO conference hall-ah Khawzawl district-a VC pathum - Khawzawl Darngawn, Khualen leh Tlangpui VC-te hnenah computer hlan a ni. Computer inhlanna hi Khawzawl DLAO K Lalhmuakliana'n a kaihruai a, additional DC K Zorammuana'n VC-te hnenah a hlan a ni.

Inkhawmpui hun nghet neih rel

Mizoram UPC Executive Committee chu nimin khan an kohhran conference hall-ah an ṭhukhawm a; Mizoram UPC hnuaia inkhawmpui hrang hrang hunbi nghet neih rawtna an thlirho a, an pawm.

PARAKH inzirtir

Mizoram Board of School Education leh Performance Assessment, Review, and Analysis of Knowledge (PARAKH) for Holistic Development, NCERT CHUAN June 22-23, 2026 chhung khan MBSE Office, Aizawlah Master Trainers’ Training on Holistic Progress Card at Secondary Stage an buatsaih. PARAKH hmalakna hrang hrang zirtir chhawng thei turin DIET leh IASE-a zirtirtute chu zirtir an ni.

PHE officer-te zirtir

Bureau of Indian Standards (BIS), Guwahati Branch Office leh Mizoram Food, Civil Supplies & Consumer Affairs (FCSCA) department chuan nimin khan PHE conference hall-ah PHE officer-te tan ni hnih awh tur capacity building programme an buatsaih. Mizoram PHE department-a executive engineer leh a chung lam officer mi 20 vel an tel a; mithiamte'n thupui 12 an zirpui a ni.

Pisaah mei zu vâi

Champhai District Anti-Tobacco Squad chuan nimiin khan squad drive neiin, DC pisa, SP pisa leh a bul hnaia sorkar pisaah phal lohna hmuna mei zu an awm leh awm loh an endik a, dan kalha mei zu man an nei lo.