Minister-in Khawzawlah IPR pisa a hawng

Information & Public Relations (IPR) minister B Lalchhanzova chuan nimin khan Khawzawlah IPR department pisa a hawng a; MJA, Champhai District member-te nen an inkâwm bawk.

B Lalchhanzova chuan, IPR department chu sorkar hmalakna leh thuchhuah pawimawhte mipui hriat tura puangzartu a nih thu a sawi a, "IPR a chak loh chuan ram kalphung tam tak hi a ṭha lo zawngin a nghawng thei. Tunlaiah thu dik lo leh belhchian dâwl lo a thang chak em em a, thu dik lo do lêt a, thu dik tak leh rintlak chhuah turin IPR department hi pawimawh em em a, MJA-te nen ṭha taka thawhho a ngai," a ti.

District hrang hranga IPR department pisate'n thawktu leh hmanrua la nei ṭha tâwk lo mah se, rim taka theihtawp chhuaha thawk zel turin IPR Minister chuan a chah a ni.

Pisa hawnnaah hian IPR secretary Betsy Zothanpari Sailo leh Khawzawl bawrhsap K Vanlalṭhiana te pawhin thu an sawi a; Khawzawl IPRO Lalchungnungi Lakher-in pisa thar chanchin a sawi. Aizawl aṭangin IPR director K Vanlalsangi leh officer dang te, Khawzawla sorkar department hrang hrang hotute leh tlawmngai pawl hruaitute an tel a ni.

IPR Minister hian nimin vêk khan Champhai District MJA member-te nen an inkâwm a, thil pawimawh hrang hrang an sawiho. Khawzawl MJA member-te nen Bawrhsap pisaah an inkâwm bawk.

Champhai MJA hruaitute chuan, district hrang hrang aṭanga MJA inkhawmpui leh pawimawh thila member Aizawl kalte tana riah theihna tur hmun an mamawh thu sawiin, ngaihtuahpui turin IPR Minister an ngen a; IPR department-in Champhaiah anmahni puala pisa an la nei loh avangin hmalak vat ni se an duh thu an hrilh bawk a ni.