ITI New Age Technology Skill Lab hawng

Industrial Training Insti-tute (ITI), Aizawla New Age Technology Skill Lab thar chu June 23, Thawhlehni khan Labour, Employment, Skill Development and Entre-preneurship (LESDE) minister Lalnghinglova Hmar-in a hawng.

ITI, Aizawla Skill Lab thar hi Bharat Forge corporate social responsibility sum hmanga din niin, Simusoft Technologies-in an bun a; Software hmanga robot khawl chi hrang hrang hnathawk thei tura design dan zirna a ni.

Skill lab hawnna inkhawm hi LESDE director Pinky Zosangpuii'n a kaihruai a ni a; Mizoram CSR Cell chairman TBC Lalvenchhunga, MLA chu special guest niin, Bharat Forage vice president Dr Leena Deshpande khualzahawm a ni.

Lalnghinglova Hmar chuan, Bharat Forge nen thawkhoa New Age Technologies zirna Skill Lab din chu Mizote'n an ṭangkaipui ngei a beisei thu sawiin, "Mizoram tan hmasawnna a ni a, zirna a thlak danglam thei dawn. Skill lab hawn a nih theih chhan hi thawhhona ṭha tak a awm vang a ni," a ti.

LESDE Minister chuan, khawvel hmasawn ang zela thiamna inher rem zel a pawimawh thu sawiin, skill lab thara khawl - PLC automation, drone technology, weilding simulator, 3D printing leh electrical simulation te chuan zirlaiteah thiamna sang zawng leh hmasawnna ṭha zawk a pek theih ngei a beisei thu sawi.

Mizoram sorkarin ITI a ngaih pawimawh thu sawiin Lalnghinglova Hmar chuan, SASCI hnuaiah ITI Aizawl tihchangtlungna tur cheng vbc 25 dah a nih thu leh, Bána Kaih hnuaiah Aizawl, Lunglei leh Siahaa ITI-te thawm ṭhat nan cheng nuai 200 dah a nih thu a sawi bawk.

TBC Lalvenchhunga pawhin thu sawiin, ITI zirlaite chu an vanneihzia hria a, theihtawp chhuah tur leh thiamna rintlak zir chhuahpui ngei turin a chah a; Dr Leena Deshpande chuan, Bharat Forge chanchin leh hmalakna tlangpui a sawi.