Sorkar pawmpui NGO library 518 a awm
Art & Culture department, Raja Rammohun Roy Library Foundation leh Mizoram Library Association te chuan nimin khan Chanmari YMA Hall-ah 14th Library Seminar & Training for Government Recognised Libraries an buatsaih. Khuallian Art & Culture minister C Lalsawivunga chuan, Mizoramah sorkar pawmpui NGO library 518 a awm mek thu a sawi.
C Lalsawivunga chuan, Mizoramah library chi hrang hrang a awm thu sawiin, "Mizoram State Library te, Aizawl, Lunglei, Kolasib leh Champhaiah District Library-te a awm a, recognise NGO library 518 a awm mek," a ti a; library-te chu hman ṭangkai a ṭul thu a sawi.
Library chu mihring hriatna tipungtu, hmasawnna kawng zawhtir theitu a nih thu sawiin Lalsawivunga chuan, "Zirna leh thiamna lama puitu ṭha tak a ni a, library-te hi ngaihhlut leh roh nachang kan hriat zel a pawimawh," a ti a; library chu mipui rawngbawl a ni tih hria a, ṭhahnemngai lehzuala library lamah ke pên zel turin kalkhawmte a fuih.
C Lalsawivunga chuan, internet-in nun dan a thlak danglam nasa tih sawiin, "Internet hian hmasawnna kawngah nasa takin min pui a, mahse, lehkha chhiar thlahthlam phah loh a pawimawh a, chutiang tur chuan library leh a hnathawktute kan pawimawh," a ti a; library ṭha thlan ṭhin, kum 2017 hnua tihtawp tawh chu chhunzawm leh ṭha a tih thu a sawi.
Art & Culture Minister sawi danin, Raja Rammohun Roy Library Foundation (RRRLF)-in scheme hrang hrang kaltlangin library-te hnenah ṭanpuina a pe ṭhin a, chumi atana sum ngaite chu sorkar laipuiin 90% tumin, state sorkarin 10% a tum ṭhin.
RRRLF aṭangin Mizoram State Library-in NGO library 137 hnenah building grant Rs 6,00,000 ṭheuh an pe tawh a, library 426 hnenah steel book rack sem a ni tawh. Kum tin recognise NGO library-te hnenah lehkhabu thar eng emaw zat sem ṭhin a ni a, kum 2025 khan library 34 hnenah computer pek a ni.
Nimina Library Seminar & Training hi Art & Culture director Carol VLMS Dawngkimi'n a kaihruai a; Library & Information Science subject-a PhD hmu thar mi pakua hnenah chawimawina hlan a ni.