Sorkar leh HPC(D) an inbe leh HPC(D)-in silai 8 sorkar-ah an hlân

Mizoram sorkar leh Hmar People Conference (Democrat)-te chu nimin khan Tourist Lodge, Chaltlangah an inbe leh a; HPC(D) aiawhte chuan police pakhatin silai a tlanbopui pahnih leh Zokhawthiang dáia MLA-te an lambun ṭuma silai an chhuhsak parukte chu Mizoram sorkarah an pe kîr.

Sorkar leh HPC(D) aiawhte inbiak meka hlawhtlinna awmte chu Home minister R Lalzirliana'n nimin khan thuthar thehdarhtute a hrilhfiah. Home Minister sawi danin, HPC(D)-te hian nimin inbiaknaah AK-47 rifle pathum, INSAS rifle pakhat, 9mm Glock pistol pakhat leh 9mm Browning pistol pathum chu Mizoram sorkar hnenah an hlan a ni.

R Lalzirliana chuan, HPC(D)-te'n inbiak an duh tih an sawiin, 'Police tlanbo Malsawmkima'n silai a tlanbopui pahnih leh HPC(D)-te'n Zokhawthiang dáia MLA-te leh anmahni zuitute an lambun ṭuma silai an chhuhsak parukte sorkara an pek kir hma chuan inbiak a theih loh' tih an sawi ṭhin thu a sawi.

Inthlan dawna HPC(D) demand area-a an kalin mipuiin sorkar leh HPC(D)-te inbia se an duh thu leh remna an duh thute an tlangaupui tih sawiin R Lalzirliana chuan, "Sorkar chuan pa ber chan changin, inhnuh hniam a ṭul kan ti a. HPC(D)-te thil phût ber autonomous district council kan pek theih loh thu erawh kan sawi a, chuti chungin tluang takin kan inbe thei a ni," a ti.

Home Minister sawi danin, sorkarin a tìra a phut, HPC(D)-te'n sorkar silai an kawlte chu inbiak hmain sorkar hnenah hlan lêt lo mah se, inremna siam hmaa hlan lêt tura tih a ni. Chumi ang chuan nimin khan HPC(D) aiawhte chuan silaite chu sorkarah an hlan. Silaite hi inbiaknaa Mizoram sorkar aiawh hotu, Home additional secretary Lalbiakzama'n HPC(D) hotute hnen aṭangin a dawng a ni.

Inbiakna a kal tluan avangin Mizoram police-te'n an man HPC(D) army chief Lalropuia Famhoite chu bail-a chhuah a nih thu sawiin Lalzirliana chuan, "A ruala an man mi pahnihte pawh bail-a chhuah tura buaipui mek a ni," a ti. Lalropuia ruala mante hi finance secretary Norbar Sanate leh Pvt. Ngurthantluanga Sanate te an ni.

Home Minister chuan, inbiakna a kal tluan avang hian Krismas leh kumthar vuakvêtah Mizoram sorkar chuan HPC(D) demand area-ah operation an chawlhsan (suspend) dawn tih a sawi a, "An tih ve tur chu an hre turah kan ngai," a ti.

Vanglaini palai zawhna HM Zira chhan danin, HPC(D) leh Mizoram sorkar hi remna ziak thei tur ang chuan an inbia a, mahse, hun a teptêr deuh tawh avangin kumin chuan inremna ziah hman a nih a rinawm lo.

Home additional secretary Lalbiakzama hnen aṭanga thu dawn danin, inbiakna hi tluang taka kalpui zel a ni a, inbiak leh hun atan February 2017 laihâwl ruahman chhin a ni. Inbiak leh hunah pawh inremna ziah theih a la beisei awm lo a, vawi hnih/thum vel thu hrual mûm tura inbiak leh a ngaih rin a ni.

HPC(D)-in sorkara silai an hlante

Silai hming A zat A mu Magazine

INSAS Rifle 1 21 4

AK-47 Rifle 3 45 9

9mm Glock Pistol 1 2 1

9mm Browning Pistol 6 3