Hriselna lama hmalaknate sawiho

State Task Force Com-mittee for Immunization on National Immunization Day (Pulse Polio Immunization 2017) and Mission Indradhanush Phase-4 chu nimin khan Health secretary Lalrinliana Fanai hoin a pisaah an ṭhukhawm a; Health department hotute bakah, School Education leh Social Welfare department leh UNICEF aiawhte an tel.

Meeting-ah hian World Health Organization (WHO)-a surveillance medical officer Dr Lalhlimpuii'n Mission Indradhanush chungchanga hmalaknate a sawi a; January 2017-a National Immunization Day on Polio neih dan tur te, February 2017-a hri danna beihpui Mission Indradhanush neih ṭan dan turte an sawiho.

Mizoram chu hri danna lamah thawk ṭha viau mah se, a dawngtu tur naupang leh nu zat chhûtna, Statistics on Recipient Child-Mother lamah a fel loh ṭhin avangin uluk taka micro plan siam a pawimawh thu sawi lan a ni bawk.

Meeting chuan, Integrated Disease Surveillance Programme (IDSP), Expanded Programme on Immunization (EPI) leh World Health Organization (WHO)-te thawkhoa thla tin inhmukhawm turin an rel a; district tina DC, BDO leh autonomous district council pathumte hri danna lama hma la ve tura ngen ni se, an ti.