KHAWTHLIR
Truck-in chíl hlum
December 15, 2016 zan dar 10 vel khan Temple-Vaivakawn kawnga Tuikualah scooty tlan lai chu truck tlan lai hnuaiah a tlu lut a, scooty khalhtu Vanlalhnehzova (29) s/o Kapzawna, Tuikual North chu truck-in chil zuiin, a hmunah a thi. Scooty leh truck hi an insûlpelh dawn laiin scooty chu truck hnuaiah a inbarh lut palh nia thu dawn a ni.
NLUP sem
Kolasiba Commerce & Industries department chuan NLUP hnuaia carpentry trade thlangtute hnenah Rs. 9,600 ṭheuh an sem. NLUP ṭanpuina hi Serlui biala mi 10, Tuirial biala mi paruk leh Kolasib biala mi pariat hnenah pek a ni.
Thisen pe
Hrangchalkawn bial ṬKP-te chuan MṬKP blood donation calendar angin nimin khan Christian Hospital, Serkawn tan thisen unit 35 an pe a, a petute mipa 22 leh hmeichhia 13 an ni.
Lirthei dah khap
Traffic SP C Lalthanmawia chuan thupek chhuahin, Zarkawt kawn atanga Chief Minister Bungalow inkar kawng chu kawng pawimawh a nih avangin December 19 aṭangin helai kawng sirah hian lirthei dah a khap.
Lehkhabu thar
Health department buatsaih, 'Demographic Profile of Mizoram' tih chu nimin khan Aizawla CMO conference hall-ah Health minister Lal Thanzara'n a tlangzarh. Lehkhabuah hian Mizoram khua zawng zawng 2011 census, naupang kum 0-6 inkar zat, kum 2012-2023 inkar chhunga mihring awm zat tura beisei (projected population) chhût chhuahte dah a ni.
PS phone no.
Mizoram police chuan Aizawla police station leh outpost-te biak pawh theihna landline telephone bakah mobile phone an dah belh a; chungte chu - Aizawl PS 8794747291, Bawngkawn PS 8794747292, Vaivakawn PS 8794747293, Kulikawn PS 8794747294 leh Zonuam Outpost 8794747295-te a ni.