Food Safety Awareness Drive buatsaih

Health department chuan nimin khan Synod Conference Centre-ah Food Safety Awareness Drive an buatsaih a, Health minister Lal Thanzara’n hmanpuiin, college, sikul leh pisa hrang hranga canteen neite an tel.

Lal Thanzara chuan, mipuite’n ei leh in thianghlim leh hrisel zawk an neih theih nan sorkarin hma a la mek tih sawiin, “Food Safety and Standards Act, 2006-in inkaih-hruaina dan a siamte hi mihring ei tur siam leh zuar ṭhinte’n an zâwm tur a ni,” a ti.

Mi hîp nan leh an thil zawrh tih îtawma tihtuihnai nana thil pawlhah mihring tana him lo a awm ṭhin avangin fimkhur a ngai tih sawiin Minister chua, “Ei leh in thianghlim leh hrisel kan neih theih nan Food Safety and Standards Act-in a phût angin ei siama zuar duhte chuan registration emaw licence emaw an neih a ṭul tawh dawn a ni,” a ti a; khawchhak lam aṭanga lo lut ei leh in turah fimkhur a ngaih thu a sawi.

Inkhawma an sawi danin, kum 2015
aṭanga kumin November thla thleng khan ei atana him leh him lo endik turin Health department-in food sample 36 an thawn tawh a, chu’ng zinga pali chu a him tâwk lo tih hmuhchhuah niin, Lion energy drink, Aisen, Paul’s squash leh Kame meat masala-te chu Mizoramah zawrh khap a ni.

Thlai chi sarih endik tawh a ni a, ei atana him tawk lo hmuh chhuah a awm lo. Thla tinin FCSCA department buhfaite endik tura thawn ṭhin a ni bawk a, tun thlengin him lo hmuh a la ni lo bawk.

Food Safety and Standards Act, 2006-in a phût angin, ei leh in lama sumdawngte chu licence/registration nei ngei tura tih a ni a, chuta tan chuan hmalak mek a ni. November 19, 2014 aṭanga December 14, 2016 thleng khan licence 316 leh registration certificate 1,089 pek chhuah a ni tawh.