Nungcha hmangaihtute khawmpui hmang

Association for Environmental Preservation (ASEP) chuan nimin khan Aizawl Press Club-ah an general assembly, ‘Nungcha hmangaihtute inkhawmpui’ tia an vuah chu an hmang a; nungcha humhalh kawnga thawk ṭha nia an hriatte hnenah chawimawina an hlan.

Nungcha hmangaihtute inkhawmpuiah hian Environment, Forests & Climate Change (EFCC) minister Lalrinmawia Ralte khuallian a ni a; ASEP president K Lalmuansanga’n inkhawm kaihruaiin, general secretary
Peter Vanlalhriata’n report a pe.

ASEP inkhawmpuiah hian Sihphir Venghlun Branch YMA hnenah YMA Sanctuary siama ramngaw leh nungcha humhalh kawngah an thawh ṭhat avangin ASEP Nopui hlan a ni a; ramngaw humhalh kawnga thawk
ṭha dang - R Zamawia, Tanhril leh K Rosiam-liana, Vaivakawnte hnenah chawimawina an hlan bakah, environmental photographer chawimawina mi panga an hlan bawk.

ASEP inkhawmpui hian resolution pali an pass a; airgun khuahkhirhna chu Home department-in khawng lehzualin kengkawh se an duh thu te, rawtuai khawrh leh zawrh chu July thla chin bakah chuan khauh taka khap an duh thu te, social media-ah ramngaw leh nungcha diriamna lam chi khuahkhirhna khauh zawka kalpui an duh thu leh, Mizorama luite a tahtawla closed season puan ni se an duh thute an tarlang.