Mizo hnam zia vawnhimtu ni turin chah

Leitlangpui Higher Secondary School chuan nimin khan an sikul-ah Cultral Fest leh Advance Christmas an hmang a; School Education changtu parliamentary secretary Joseph Lalhimpuia’n hmanpuiin, zirlaite chu khawi hmunah pawh awm se, Mizo hnam zia vawnghimtu ni turin a chah.

Joseph Lalhimpuia chuan, “Pi leh pute aṭanga rohlu kan neih aia upa zahna, tlawmngaihna, rinawmna leh taimaknate hi hnam dangte’n Mizote min ngaihsanna leh hriatna a ni. Zirlaite hi khawi hmunah pawh awm se, Mizo hnam zia vawnghimtu leh chawi sangtu kan nih zel a ngai,” a ti.

Parliamentary Secretary chuan, Leitlangpui HSS chu kum 2016-17 financial year chhungin class room zauhna atan School Education department aṭangin cheng nuai 20 pek a nih tur thu leh, class room tina dah turin green board pek a nih tur thu a sawi.

Joseph Lalhimpuia hian Lunglei DEO pisa bula Education Complex, cheng nuai 100 sénga sak mek tlawhin, hna thawh mek dan a enfiah nghal bawk.