ATM-a pawisa awmtir reng turin bank ngen

Mizoram Consumers’ Union (MCU) chuan thuchhuah siamin, Rs. 500 leh Rs. 1,000 tihthih vanga mipui harsatna phuhrukna turin Mizorama bank hrang hrangte chu ATM-ah engtik lai pawha pawisa a awm reng theih nana ṭan la turin an ngen.

MCU chuan, India ramah November 9, 2016 aṭanga Rs. 500 leh Rs. 1,000 note tihthih chuan tun thlengin mipuiah harsatna a thlen mek zel tih an sawi a, “Krismas vuakvêtah mipui harsatna sutkian a nih theih nan MCU rawtnate tihlawhtling turin Mizorama scheduled/public sector bank leh private bank zawng zawng kan ngen a. Reserve Bank of India (RBI) pawh MCU rawtna tihlawhtling turin a ṭul anga hma la turin kan ngen a ni,” an ti.

MCU chuan, ATM booth ṭhenkhatah pawisa a awm lo fo tih sawi-in, eng lai pawha mipuiin an hman ṭangkai theih nan ATM booth tinah pawisa dah khat reng turin an ngen. Bank ṭhenkhatah chawhma dar 10 hmain pawisa lak chhuah leh dah luh a theih loh ṭhin tih sawiin, working day-ah public/customer-te tan chawhma dar 9 aṭanga tlai dar 4:30 thleng pawisa lak chhuah leh dah luh theiha siam turin an ngen bawk.