Dawrpuia kawng zauh dan tur sawiho

Nimin zing khan UDPA minister Zodintluanga hoin Dawrpui Jail Venga Mizo Hnam Ro Chawisang Pawl building-ah Aizawl Civil Hospital (ACH) hnuai kawng phei leh Dawrpui Jail Veng huam chhunga kawngpui zauh tur chungchang sawiho a ni.

Zodintluanga chuan, Aizawl khawpui chhunga kawng péngṭhuam pawimawh leh lûn lai hmun pali-ah zauha siamṭhat a nih tawh thu sawiin, ACH hnuai kawngpui phei pawh OPD building bul thlenga râwt hniama zauh tum a nih thu a sawi a; Aizawl Police Station péng pawh râwt hniama electric transformer pawh sawn tum a nih thu leh, Jail Veng péngṭhuam lai pawh râwt hniam tum a nih thu a sawi.

UDPA Minister chuan ruahman anga kawng an siam theih chuan motor lian tan pawh awlsam taka tlân theih a nih tur thu sawiin, "Motor lian leh city bus-te pawh Jail Veng lamah vek tlantir tum a ni a, motor parking pawh zau zawk a awm thei dawn a ni," a ti a; harsatna dang a awm loh chuan January 3, 2017-ah hna thawh ṭan beisei a nih thu a sawi bawk.

Mizo Hnam Ro Chawisang Pawl hruaitute chuan, Dawrpui Jail Veng péngṭhuam leh Millennium Centre inkar kawng râwt hniam a nih chuan, a bul hnaia inte leh Salvation Army biak-in tan a him lo thei dawn niin an sawi a; tuna a awm dan chu khawih danglam loh an duh ber thu Minister an hrilh. Dawr-pui khawtlang hruaitute chuan, kawng zauh tur chung-changah hian December 19 zanah khaw-tlanga inrâwnna leh inhrilhfiah-na neih ṭha an tih thu an sawi a ni.