KHAWTHLIR

Sorkar laipuia minister of state for Food Processing Industries Rameswar Teli hoin nimin khan Aijal Club-ah lo neitute thlai thar enkawl aṭanga a hralh chhuah thleng ṭanpuina tura duan, Pradhan Mantri Kisan Sampada Yojna (PMKSY) chungchang zirhona buatsaih a ni. He hunah hian Food Processing Committee director Amrit Deorah chuan, PMKSY chu entrepreneur leh industry chi hrang hrangte'n an hlâwkpui thu te, hmar­chhak bialah Mega Food Path pahnih din a nih tawh thu leh NE state pariat zingah entrepreneur mi 500 chuangte'n hlâwkna an tèl tawh thu a sawi.

Zo Reunification Organization (ZORO) chuan thuchhuah siamin, kuminah Zo hnahthlak mi pathumin India sorkarin civil mi a chawimawina sang padma award an dawng chu an lawmpui thu an tarlang a; MC Mary Kom-i'n Padma Vibushan, C Kamlova leh Lalbiakthanga Pachuau ten Padma Shri an dawng chu an chhuan tak zet thu an sawi a ni.

Kolasib District Level Fire Prevention Committee chu nimin khan district bawrhsap Sangchhin Chinzah kaihhruaiin DC conference hall-ah an ṭhu a, Fire Prevention Week hman hun atan February 10-15, 2020 an ruat. Meeting-ah hian, kumin ṭhál chhungin ram kâng a awm loh nan te, LPG leh electric wiring fimkhur loh vanga kângmei chhuak a awm loh nante thuthar thehdarhtute kaltlanga inzirtirna nasa zawk kalpui dan tur leh tlawmngai pawlte nena hmalak dan turte an rêl. 

PWD-in January 27 aṭanga February 2, 2020 chhungin Ramhlun Industry péng leh Zirtiri College inkar kawngpui an siam dawn avangin, kawng siam chhungin he kawngpui hi khar a nih dawn thu Traffic SP Rodingliana Chawngthu chuan a tarlang. Hnathawh tibuai thei tura kawngpui sira lirthei leh bungrua dah phal a nih loh thu a tarlang bawk. Tlaklui leh Industry péng inkar kawng khar chu kawng siam zawh a nih tawh avangin sût a nih thu a tarlang bawk a ni.