NEDP-ah khua leh bial bik cheina tur Sum dah a ni lo - Planning department

Planning department-ah chuan New Economic Development Policy (NEDP) hnuaiah MLA-te tana khaw bil cheina leh bial cheina tur sum dah a awm lo tih an tarlang.

Agriculture minister R Lalzirliana chuan October 18, 2016-a Congress Bhavan-a thu a sawinaah, NEDP hmangin MLA-te tan khaw bil cheina tur cheng nuai 70 leh bial bik cheina atan cheng nuai 100 awm tura a sawi chungchang chu Planning department-ah RTI Act hmangin zawh a ni. Zawhna hi December 1, 2016-ah thehluh niin, December 12-ah chhanna pek chhuah a ni a; Planning SPIO chuan, khua leh Assembly bial bil cheina turin NEDP-ah sum ruahman a nih loh thuin a chháng.

Planning department tarlan danin, NEDP hnuaiah scheme leh project hrang hrangte tan operational guidelines siam a ni a, chu chu Planning department website www.planning.mizoram.gov.in/new-economic-development-policy.html-ah leh NEDP Booklet-ah tu pawhin an en theih turin dah a nih thu leh, chumi bak chu NEDP-ah thil dagn a awm rih lo.

MLA-te'n bial bik cheina atana nuai 100 ṭheuh an nei tur anga sawi chu Planning SPIO chuan, 'State-in Plan Fund aṭanga MLA-te kum khatah cheng nuai 100 a buatsaihsak hi NEDP-a mi a ni lo" tiin a chháng. NEDP aṭanga khaw bil cheina tur nuai 70 leh bial bik cheina tur nuai 100 dah tur anga sawi chu Planning department-in a hriatpui leh hriatpui loh bakah, a hriatpui a nih chuan sorkar document-te dil a ni.

SPIO chuan, "NEDP hnuaiah hian khaw hrang hrang cheina tur urban area atan Schemes for Composite Infrastructure Development and Improvement of Urban Infrastructure in the City/Towns leh Improvement of Urban Mobility Schemes for Aizawl City a awm a. Rural area atan Local Development Composite Schemes leh Chief Minister's Rural Housing Schemes ruahman a ni bawk. Heng scheme-te atana thawh dan tur chu NEDP Operational Guidelines (Planning website-a dah)-ah tarlan a ni a. Heta rawn sawi lan cheng nuai 100 leh 70 hi NEDP aṭanga lang thei bak hi sorkar file-ah a awm chuang lo va. Chuvangin, website-a mi hi rintlak tawka ngaih tur a ni," a ti.

MLA fund tia an sawi, 'Members of Legislative Assembly Local Area Develop-ment Scheme (MLALADS)' hi siam a nih hnuah ṭum 12 tihsan tawh a ni a, kum 2005-06 khan Rs. 5,00,000-in bul ṭan a ni. Planning department-in sum hman dan tur kaihhruaina fel tak a siam angin hman ṭhin a ni a; MLA pakhat tan nuai 50 ni
ṭhin chu kumin aṭangin cheng nuai 100-ah tihsan a ni.