Cheng nuai 9,483.93 hû ruihhlo hâl

Excise & Narcotics department (END) chuan Ruihhlo Dona Ni - International Day against Drug Abuse & Illicit Trafficking pualin nimin khan Bethani Multipurpose Farm, Phunchawngah court-in a chinfel tawh ruihhlo Rs 94,83,93,855 (nuai 9,483.93) hu an hâl.

END-in ruihhlo an hâlte hi court-in thubuai 600 a chinfel tawha mi a ni a; hâlna inkhawm END joint commissioner Peter Zohmingthanga'n a kaihruai a, deputy com-missioner T Lalram-zauva'n ruihhlo hâl tâk chanchin tlangpui a sawi.

Ruihhlo hâlna hun hmanpuitu END secretary C Lalruaia chuan, ruihhlo donaa rim taka thawktute chhuanawm a tih thu sawiin, ṭhahnemngai lehzual thawk turin a fuih. END commissioner Z Lalhmangaiha pawhin thu sawiin, ruihhlo hâl tâkte chu END leh Police bakah, Central YMA leh agency hrang hrangte man a nih thu a sawi.