Sakawrhmuituai tlangah thing phun

June 24, Nilaini khan Rural Development minister Prof. Lalnilawma hoin DRDO office, Aizawl leh Sihphir Village Council chuan Green Mizoram pualin Sakawrhmuituai tlangah thing phun hnatlang an huaihawt a, thing ṭiak 20 an phun.

Prof. Lalnilawma chuan, sik leh sa danglam zel vangin ruahtui tlak dan a mumal thei tawh loh thu a sawi a, "Hei hian kan mamawh em em tui harsatna a siam nasa em em. Khawvel hmun hrang hrangah tui harsatna hian zual lam a pan zel a, boruak thianghlim leh sik leh sa mumal tak min pe theitu thing phun a pawimawh em em a ni," a ti.

RD Minister chuan, thing tam tak phun a pawimawh rualin, phun ang angte him taka an puitlin theih nan uluk taka enkawl zui a pawimawh thu a sawi a; mihringte mamawh thilah thing kih/lak a ngaih châng awm mah se, mamawh bâk chu khawih loha humhalh a, duat taka enkawl a ṭul thu a sawi bawk.