KHAWTHLIR

Thisen pe

Nimin khan KṬP, Dawrpui Vengthar Branch-in Synod Hospital tan thisen unit 39 an pe. Chawnpui Branch YMA pawhin nimin khan Civil Hospital, Aizawl tan thisen unit 36 an pe a, petute mipa 33 leh hmeichhia pathum an ni.

Chapchar Kût Souvenir tlangzarh

Chapchar Kut Post Souvenir 2026 buatsaih chu nimin khan chief minister Lalduhoma, Chapchar Kût Organising Committee chairman-in a tlangzarh. Kût lehkhabuah hian Aizawl leh district khawpui bakah, state pawn khawpuia Mizote'n Chapchar Kût an hman dan chanchin te, Mizo article 12 leh English article panga dah a ni.

MLA-in kâwm

Aizawl North-II bialtu MLA Dr Vanlalthlana, minister chuan nimin khan a bial chhunga ZPM local Council member-te leh an party unit hruaitute White Stone, Ramhlun North-ah a kâwm. Khawtlang mamawh leh hmalakna tur chi hrang hrang sawiho a ni.

Smart classroom

Synod Higher Secondary School-a smart classroom dah thar chu nimin zing khan Synod executive secretary Rev. Dr Rosiamliana Tochhawng-in Pathian hnenah hlanin a hawng. Smart classroom atan hian kum 2013 aṭang khan Synod Education Board hmalaknain Synod HSS science stream-ah ṭan a ni a, Next Education India nen an thawhho a ni. Synod HSS-ah hian classroom 24 awmin, room tinah interactive flat panel dah a ni a, room pahnih chu smart classroom a ni.

Directorate of Public Library duh

Art & Culture department leh Raja Rammohun Roy Library Foundation (RRRLF) leh Mizoram Library Association ten ni hnih awh 14th State Level Library Seminar & Training for Govt. Recognised Libraries an buatsaih chu nimin khan chhunzawma zawh a ni. Nimin khan General Body Meeting neih a ni a, "Public Library Act, 1993 pass tawh zûlzuiin sorkarin Directorate of Public Library din thuai rawh se," an ti.