Kuminah TB vangin mi 71 an thi tawh

Nimin khan National Health Mission (NHM) Mission Director pisaah State TB Forum Meeting neih a ni a; kumin 2026 chhungin Mizoramah ngawr (tuberculosis) vei mi 1,087 hmuh chhuah a nih tawh thu leh, TB vangin mi 71 an thih thu tarlan a ni.

Ṭhutkhawm hi NHM mission director Dr R Lalchhuanawma'n a kaihruai a; National Tuberculosis Elimination Programme (NTEP)-a thawk State TB Officer leh thawktu dangte'n Mizorama TB vei an pun zel loh nan leh ṭhahnemngai taka an thawh thu sawiin, TB ûm bo a nih zel theih nan theihtawp chhuah zel turin a chah.

State TB officer Dr Zochhuanawmi tarlan danin, January-June 25, 2026 chhungin Mizoramah TB vei rinhlelh mi 61,246 endik aṭangin TB vei mi 1,087 hmuh chhuah a ni. Mi 1,087-te chu mipa 600 (57%) leh hmeichhia 445 (43%) an ni a, kum 14 hnuai lam 68 (6.5%) leh kum 14 chung lam 977 (93.5%) an ni.

Multi Drug Resistance-TB (MDR-TB) vei mi 47 hmuh chhuah a ni a, chuap TB vei 520 (49%) leh chuap pawn lam TB vei 538 (51%) an awm. TB leh HIV vei kawp mi 92 hmuh chhuah a ni bawk. TB vei hmuh chhuah zinga 86.49% chu enkawl dam an ni a; kuminah TB vangin mi 71 an thi tawh thung.

TB veite chhawmdawlna - Pradhan Mantri TB Mukt Bharat Abhiyaan - Nikshay Mitra Initiative kalpui meka Food Basket-ah mi 103-in ṭanpui an thawh a, Food Basket dawngtu mi 374 awm tawhin, chu chu TB vei hmuh tawh aṭangin 28% vel a ni.

Nimina ṭhutkhawmah hian, TB vei damlo, damdawi-ina enkawl mamawhte tan sorkar damdawi-inah ICU khum pakhat leh general ward-a khum panga hauh a nih theih nan hmalak ni se, an ti. TB ûm bona atana campaign TB Mukt Bharat 100 Days Campaign leh TB chungchanga hmalakna dangte thlirhona ni bawk.