MLA-in Kolkata Port a tlawh

Kaladan Multi Modal Transit Transport Project (KMMTTP) leh rel rawn lutin Mizoram mipuia nghawng a neih dan tur zir chiang tura Mizoram sorkarin a din, Study Committee chairman T Lalhlimpuia, MLA chuan nimin khan Kolkata Port a tlawh.

T Lalhlimpuia hi Port hotute'n lo dawngsawngin, hmunhmate an fanpui a; KMMTTP hawn a nih hunah Kolkota Port kaltlanga hmarchhak state ṭhenkhatte'n an mamawh eng emaw zat an lak an rin thu te, thlai thar leh bungrua lei leh hralh chungchangah awlsamna nasa tak a thlen ngei tura beisei a nih thute an lo hrilh.

T Lalhlimpuia hi Study Committee member Zomuana leh Mizoram House joint resident commissioner Zoremthara Ralte leh thawktu dangte'n an ṭawiawm a ni.

Study Committee Chairman hian June 24, Nilaini khan Assembly speaker Lalbiakzama nen ICP Petrapole, Land Port Authority of India (LPAI)-in an enkawl West Bengal leh Bangladesh inrina Border Trade Point an tlawh. He Border Trade Point hi Integrated Check Post (ICP) niin, Asia khawchhak lama landport lian ber a ni.

Lalbiakzama leh T Lalhlimpuia te hi Land Port manager Kamlesh Saini leh Custom assistant commisisoner Avijit Bose ten Land Port kalphung leh ICP hnathawh dante enpuiin an hrilhfiah a ni.