Mizoramin ama puala sum a thawh chhuah pawimawhna mipuiin an hre zel - LRS Minister

Nimin khan Land Revenue & Settlement (LRS) department chuan Folkland Park conference room-ah 'State Level Review Meeting' an buatsaih a, he hunah hian LRS minister B Lalchhanzova chuan mipuite'n Mizoramin ama puala sum a thawh chhuah pawimawhna an hriat chhoh zel thu a sawi.

LRS Minister chuan kum hnih leh a chanve an thawhho chhungin thawktute ṭanrualna avangin mipui pawhin thil ṭha tih tum leh hmasawn tumah an department an hmu nia a hriat thu sawiin, "Kan department laka mipuiin rinna an nghaha, rinngam kan nihna lantir turin minister ka nih angin hma ka hruai a, keima pualin ram khawi hmunah mah ka inpe lo," a ti a, a thawhpuite pawh a hnung zui ngam turin a fuih.

B Lalchhanzova chuan Revenue department chu Mizoramin ama puala sum a hmuh theihna (state own revenue source) pawimawh tak a nih thu sawiin, "Mipui pawhin Mizoramin ama puala sum a thawhchhuah pawimawhna an hrethiam chho zel. Kum kal ta khan stamps & registration bakah land tax leh non tax aṭanga department sum lakluh vbc 40.23 a tling chho a, pung chho ṭha hle. Heng sumte hi Mizoram sokar ta liau liau, state mamawha hman tur a ni," a ti.

Review meeting hi LRS secretary Vanlalmawia'n kaihruaiin, epartment hmalak meknate leh hmathlir bakah an hnathawh kawnga harsatna hrang hrangte sutkian dan tur an sawiho.