Hmun hrang hrangah Ruihhlo Dona Ni hmang

International Day against Drug Abuse & Illicit Trafficking hi Siahaah chuan DRDO Conference Hall-ah hman niin, additoinal DC Abraham Beirazi Khithie-a'n a hmanpui a; Nasha Mukt Bharat Abhiyan leh Mizoram State Rural Livelihoods Mission huaihawt a ni.

Lawngtlaiah chuan DC Office buatsaihin DC Conference Hall-ah hman a ni a, bawrhsap Donny Lalruatsanga'n kaihruaiin, adviser to chief minister (Health) Dr Lorrain Lalpekliana Chinzah, MLA khuallian a ni. Khuallian hian ruihhlo donaah theihtawp chhuah chhunzawm zel turin mipui a sáwm a, "A bik takin ruihhlo ṭhat lohzia inzirtirna kawngah rahbi thar kai a, uar zawka kalpui a ṭul," a ti.

Lawngtlaiah hian Central YLA, Gilead Drop-in Center, Excise & Narcotics department leh Lairam Rescue Center te aṭangin report ngaihthlak a ni a; ruihhlo donaa thawk ṭhaa thlan - Excise & Narcotics department, CYLA leh Lawngtlai MJA Lawngtlai te hnenah lawmthu sawina hlan a ni.

Ruihhlo Dona Ni-ah hian Mamitah chuan District Drug Disposal Committee hmalaknain Mamit District Hospital incinerator-ah bawrhsap Suvigya S Chandra hoin damdawi leh ruihhlo eng emaw zat hâl ral a ni. Ruihhlo hâlte chu Mamit Police Station leh West Phaileng PS hnuaia man heroin gram 118.08 leh methamphetamine kg 1.89 a ni a, Rs 48,41,400 hû chhut a ni.

Nimin vek khan Khawzawl DC Conference Hall-ah Nasha Mukt Bharat Saptah khârna leh International Day Against Drug Abuse and Illicit Trafficking hman a ni a, bawrhsap K Vanlalṭhiana’n a hmanpui. Ruihhlo Dona Ni puala 'On the Spot Painting Competition on Ruihhlo Do' leh 'Hlado Chham on Ruihhlo Do Competition' inelnaa ti ṭhate hnenah lawmman sem a ni.

Khawzawl SP F Lalbiakzauva tarlan danin, kumin 2026-ah June 25 thlengin Khawzawl district-ah heroin gram 665.87, methamphetamine kg 1.972 leh Myanmar zu (BEDC) litre 1,352.5 man a ni.

Ruihhlo Dona Ni leh Nasha Mukt Bharat Abhiyaan pualin nimin khan Hnahthialah ruihhlo dona kawngzawh huaihawt a ni a; bawrhsap K Vanlalruati, sorkar official te, tlawmngai pawl aiawhte leh, sikul 13 aṭangin zirlai 494 leh zirtirtu 26 an tel. NMBA puala sikul zirlaite tana Drawing Competition-a ti ṭhate hnenah lawmman sem nghal a ni.

Kum 1987-a UN General Assembly chuan International Day Against Drug Abuse and Illicit Trafficking hman turin a rel a, 1989 aṭang khan June 26-ah hman ṭhin a ni a; kumin hian Mizoramah chuan sorkar pisa chawlh ni a nih avangin nimin khan hman a ni. Ruihhlo Dona Ni hmannaah hian ruihhlo ti lo tura intiamna thu sawi rual a ni a, signature campaign neih a ni bawk.