Nasha Mukt Bharat Saptah khâr a ni

June 17, 2026 aṭang khan Mizoramah Nasha Mukt Bharat Saptah (Drug-Free Week) hman a ni a, June 26 thleng hman tur ni mah se, nimin khan hmun ṭhenkhatah khar a ni.

Serchhip district-a Nasha Mukt Bharat Saptah hman chu nimin khan DC Pisapui Hall-ah kharna inkhawm buatsaih a ni a; Serchhip additional DC Dorothy Muansangi khuallian niin, SDO (Sadar) Rebecca Laldinmawii Hrahsel-in a kaihruai. Serchhip SP Gavit Gogna, sorkar department aiawhte leh MJA leh khawtlang hruaitute an tel.

Serchhip SP Gavit Gogna chuan, Serchhip Police-te'n June 26, 2025 leh kumin June 25 inkarah Serchhip district-ah heroin kg 1.3 leh ganja kg 2.9 bakah, zu litre 800 man a nih thu leh, NDPS Act tlawhchhanin thubuai paruk ziah luh a nih thu a sawi.

Nasha Mukt Bharat Saptah chhung hian Serchhipa hmun hrang hrangah awareness campaign buatsaih a ni a, pledge leh signature campaign neih a ni. Serchhip district-a zirna-in 120 chuanga zirlaite hnenah ‘Ruihhlo zunzam - Drug Awareness Film’ chhuah a ni bawk.

Nimin khan MzSRLM leh Phullen RD Block huaihawtin Phullen Senior Secondary School leh National High School, Phullenah Nasha Mukt Bharat Abhiyan campaign buatsaih a ni.

Inkhawm hi Phullen Senior Secondary School principal F Lalmuanzuala'n a kaihruai a; Phullen BDO J Lalhmahruaia'n ruihhlo chungchanga zirlaite hriat tur pawimawhte a sawi.