KHAWTHLIR

Damlo enkawl nan vbc 37.84 pe tawh

Mizoram sorkar chuan sorkar kum kal mekah Mizoram Universal Healthcare Scheme (MUHCS) hmangtu damlo 13,609-te enkawlna senso atan MUHCS zawmtu damdawi-inte hnenah cheng vbc 37.84 a pe chhuak tawh. MUHCS sum hi sorkar kum kal mekah ṭum sarih pek chhuah tawh a ni.

Kawng khar ṭhin

Aizawl Traffic SP C Vanlalvena chuan hriattirna chhuahin, Kangthelhkawn leh Ebenezer Hospital inkar kawngah pipe phûm a nih dawn avangin, nizan aṭanga June 29, 2026 thlengin zan dar 9 aṭanga zing dar 6 inkarah kawng khâr ṭhin a nih dawn thu a tarlang.

Oil palm vailiam

Siaha additional DC Abraham Beirazi Khithie chuan nimin khan Siaha district-a thar oil palm rah (FFB) quintal 19 chu Godrej Agrovet, Bukvannei Kolasib, district-a hralh turin Amobyu Vaithie, Zero Point aṭangin a vailiam. Oil palm-te chu kum 2014-a chìn tawhte a ni a; National Mission on Edible Oil - Oil Palm hnuaiah kum 2025-26 khan Siaha district-a khaw pasarihah oil palm chin niin, kûng 17,520 a awm mek a ni.

Ruihhlo Dona Ni

Mamita Excise & Narcotics department-a thawkte chuan nimin khan Mamit END Recreation Hall-ah 'International Day Against Drugs Abuse & Illicit Trafficking' an hmang a, khawtlang hruaitute leh tlawmngai pawl hruaitute an tel. Inkhawm hi Mamit END assistant commissioner Lalsangzuala Ralte-in a kaihruai a, sub-inspector K Lalzawmliana'n NDPS Act 1985, MLP Act 2019 leh BNSS 2023 chungchang a sawifiah a ni.

Computer hlan

Kolasib district bawrhsap H Dolianbuaia chuan June 25, Ningani khan Kolasib district-a VC pasarih hnenah computer a hlan. VC-te hnena computer pek hi Rural Development & Administration department-in Rashtriya Gram Swaraj Abhiyan hnuaia a ruahman a ni a; Buhchangphai, Kolasib Venglai, North Chaltlang-I, Phainuam, Rengtekawn, Saihapui-V leh Vairengte-II VC-te hnenah pek a ni.